काठमाडाैं, मंसिर ५ ।
काठमाडौंको नक्साल नन्दीकेशर बगैँचा (नारायण चौर) मा यही मंसिर ८ र ९ गते वुमेन अफ द वर्ल्ड (वाउ), को सातौँ संस्करण आयोजना हुने भएकाे छ । महिला र बालिकाहरूले भोगिरहेका यावत् समस्या समाधान गर्न आपसी सिकाइ र भोगाइबाट उपाय खोज्ने प्रयास यसको मुख्य उद्देश्य रहेकाे छ । लैङ्गिक उत्तरदायी समाज निर्माण गर्न सार्वजनिक सरोकारको विषयमा सम्मेलनले धेरै मानिसलाई एकै ठाउँमा ल्याउने अपेक्षा गरिएको छ । यसका लागि ब्रिटिस काउन्सिलले काठमाडौं महानगरपालिका र द वाउ फाउण्डेशन, बेलायतसँगको सहकार्यमा सम्मलेन आयोजना गर्न लागिएको हो । यसमा नेपाली र बेलायतीबीच साझेदारी रहने भएकाे छ ।

यस्ता कार्यक्रमहरू सामान्यतया बन्द कोठाभित्र हुने गरेका छन् । यसलाई खुला र सबैको पहुँचमा लैजान यसपटक बगैँचामा कार्यक्रम आयोजना गर्न लागिएको हो ।

सम्मेलन, समानता र लैङ्गिकता बारे आपसी र सिकाइ आदान-प्रदान गर्ने सार्वजनिक मञ्च हो । १० हजारभन्दा बढी व्यक्तिहरूको सहभागिता हुने अपेक्षा गरिएको महोत्सव प्रवेश निःशुल्क गरिने भएकाे छ । महोत्सवमा काठमाडौं महानगरपालिकाका उपप्रमुख सुनिता डंगोलले राजनीतिक प्रतिनिधित्व गर्ने भएकी छन् । कथा घेरा थिएटर, कर्णाली कला केन्द्रसहित गायिका कुन्ती मोक्तान, गायिका सुवानी मोक्तान, रचना दाहाल, गौमाया गुरुङ्गसहित २ सयभन्दा धेरै महिला कलाकारहरूकाे सहभागिता रहने भएकाे छ । जहाँ उहाँहरूको दमदार प्रस्तुति रहने छ ।

२ दिनसम्म चल्ने महोत्सवमा बिहान योग बक्सिङ्ग हुनेछ भने दिनमा चलचित्र प्रदर्शनी, कार्यशाला, अन्तरक्रियात्मक छलफल र संवाद, परामर्श सत्रहरू, प्रदर्शनी, स्थानीय उत्पादन तथा खानाको बिक्री, गीत, संगीत, गायन, नृत्य तथा कला प्रस्तुतिसँगै बालबालिकाका लागि विशेष खेल र मनोरञ्जनात्मक कार्यक्रम सञ्चालन हुनेछन् । फेस्टिभलमा अल्पसंख्यक कलाकार तथा वक्ताहरूलाई समावेशी तथा लैङ्गिक क्षेत्रमा गरेका कामका विषयमा जानकारी दिन, सोच प्रदर्शन तथा धारणा राख्नका लागि अवसरसमेत प्रदान गरिनेछ । यहाँ सहभागी महिलाहरूले आफ्ना समस्या, दवाब, अभाव र अवसरका विषयमा खुला छलफल गर्नेछन् । यो राजनीतिकर्मी, अधिकारकर्मी, कला, साहित्य र संगीतजस्ता सिर्जनात्मक क्षेत्रका काम गरिरहेका महिलाहरूले आफ्ना क्षेत्रका अनुभव बाँड्ने अवसर पनि हुनेछ ।

यसरी चल्ने सत्रहरूमा जलवायु परिवर्तन, खेलकुद, आमसञ्चारलगायत विभिन्न पेशामा महिलाको भूमिका र पहिचानका विषय समेटिने छन् । लैङ्गिक मुद्दामा महिला र बालिकाहरूको क्षमता वृद्धि गर्ने महिला नेतृत्वमा प्राप्त महत्वपूर्ण उपलब्धि र उपलब्धि हासिल गर्दाका प्रयत्नका विषयमा उत्प्रेरणात्मक सत्र चल्नेछन् ।

‘लैङ्गिक र समावेशी कार्यक्रम’ सञ्चालन गर्न काठमाडौं महानगरपालिकाले ब्रिटिस काउन्सिलसँग गएको बैशाख १० गते समझदारी पत्रमा हस्ताक्षर भएको छ । सम्मेलनपछि लैङ्गिक संवेदनशीलताका विषयमा सचेतना र जागरुकता बढाउन २ सय जनालाई शीप प्रदान गर्ने कार्यक्रम सञ्चालन हुनेछ ।

महोत्सवको मिति : २०८१ साल, मंसिर ८ र ९ गते शनिबार र आइतबार ।

समय: बिहान ८ बजेदेखि बेलुकी ८ बजेसम्म ।

स्थान : नन्दी केशर बगैँचा, नारायणचौर, नक्साल, काठमाडौं ।

कार्यक्रम तालिका: www.britishcouncil.org.np/WOWFestival2024

के हो वुमेन अफ द वर्ल्ड ?

यो सन् २०११ मा लण्डनको साउथ बैङ्कबाट सुरु भएको महिला सशक्तिकरणसँग सम्बन्धित अभियान हो । यसका अघिल्ला श्रृङ्खलाहरूमा मलाला युसुफजाइ, एनी लेनोक्स, प्याट्रिक स्वीवर्ट, जुली वाल्टर्ससहित विश्व प्रख्यात महिला वक्ताका रूपमा सहभागी भइसकेका छन् । लैङ्गिक समानता र समावेशीकरणका लागि सकारात्मक परिवर्तन गराउन महिलाहरूको आवाजलाई सशक्त बनाउनु कार्यक्रमको मूख्य लक्ष्य हो । हालसम्म विश्वका ६ महादेशहरूको ४५ भन्दा बढी स्थानहरूमा ५० लाखभन्दा बढी व्यक्तिहरूले सहभागिता जनाइसकेका छन् ।

वाउ मधेश २०१९ फोटोहरु :

www.flickr.com/photos/britishcouncilnepal1/albums/72157712284438437

www.flickr.com/photos/britishcouncilnepal1/albums/72157712899289513

वाउ नेपाल लुम्बिनी २०२२ फोटोहरू : www.flickr.com/photos/britishcouncilnepal1/albums/72177720298762296

वाउ काठमाडौं २०१८ भिडियो : www.youtube.com/watch?v=akNC9lCX3Wc&t=18s

वाउ मधेश २०१९ भिडियो : www.youtube.com/watch?v=lWNC16lYPZY&t=12s

वाउ नेपाल लुम्बिनी २०२२ भिडियो : www.youtube.com/watch?v=SVmgNuO6HD4&t=17s