काठमाडाैं, मंसिर ६ ।
‘डकुमेन्ट्री इन एन्थ्रोपोसन’ थिममा आज बिहीबारदेखि फिल्म साउथ एशिया महोत्सवको चौथौ संस्करण ललितपुरमा सुरु हुने भएकाे छ ।

ललितपुर महानगरपालिका पाटनढाेकास्थित यलमाया केन्द्रमा हुने उक्त चार दिने महोत्सवमा विभिन्न देशका ४७ वटा लघु चलचित्र र वृत्तचित्र प्रदर्शन गरिने भएकाे छ । महोत्सवमा नेपालसहित भारत, पाकिस्तान, बङ्गलादेश, श्रीलङ्कालगायतका नौ वटा राष्ट्रका चलचित्रहरू प्रदर्शन गर्ने कार्यतालिका रहेकाे छ ।

महोत्सवका सहायक निर्देशक पवस मानन्धरले यस वर्ष वेस्ट फिल्म इन द क्लाइमेट क्राइसिस अवार्ड थप गरिएको उल्लेख गर्दै उत्कृष्ट चलचित्र, जुरी अवार्ड, उत्कृष्ट स्टुडेन्ट चलचित्र, उत्कृष्ट डेब्यु चलचित्र र उत्कृष्ट फिल्म इन द क्लाइमेट क्राइसिस अवार्डको लागि प्रतिस्पर्धा हुने जानकारी दिएका छन् ।

‘बिहान ९ बजेदेखि महोत्सव सुरु हुनेछ । निर्देशनसम्बन्धी कार्यशाला पनि हुँदैछ,’ उनले भने, ‘वृत्तचित्र हेर्न र सिर्जना गर्न चाहनेका लागि यो महोत्सव एउटा सुनौलो अवसर हो ।’

कार्यशालामा भारतका निर्देशक कवीर खानको उपस्थितिसमेत रहने बताइएको छ । महोत्सवमा पहिलो दिन तीन वटा हलमा विद्यार्थीहरूद्वारा सिर्जित सात लघु चलचित्र प्रदर्शन गर्ने तयारी रहेको मानन्धरले बताएका छन् ।