एजेन्सी, मंसिर ६ ।
बेलायतका पूर्वउपप्रधानमन्त्री जोन प्रेस्कटको ८६ वर्षको उमेरमा निधन भएको उनको पारिवारिक श्राेतले बिहीबार जनाएको छ । प्रेस्कटले जलवायु परिवर्तनसम्बन्धी सन् १९९७ को अन्तर्राष्ट्रिय क्योटो प्रोटोकलमा बेलायतका लागि वार्ताको नेतृत्वसमेत गरेका थिए ।

अमेरिकाका पूर्वउपराष्ट्रपतिलगायतले उनीप्रति भावपूर्ण श्रद्धाञ्जली अर्पण गर्दै जलवायु संकट समाधान गर्ने उनको प्रतिबद्धता प्रति सदाका लागि आभारी हुने बताए ।

बेलायती लेबर पार्टीबाट प्रधानमन्त्री बनेका कीर स्टारमरले प्रेस्कट श्रम आन्दोलनको अभियन्ताको रूपमा श्रमजीवी जनताको समर्थक र ट्रेड युनियनवादी रहेको बताए ।

चार दशकसम्म उत्तरी इङ्ग्ल्याण्डकाे संसद् सदस्यको रूपमा सेवा गरेका पूर्वव्यापारी नाविक तथा ट्रेड युनियन कार्यकर्ता प्रेस्कटको शान्तिपूर्वक मृत्यु भएको उनकी श्रीमती पाउलिन र छोराहरूले स्पष्ट पारेका छन् ।

प्रेस्कटलाई सन्-२०१९ मा प्यारालाइसिल भएको थियो भने अल्जाइमरको समस्याका कारण गत जुलाईमा संसद्को माथिल्लो सदनको सदस्य पद छोडेका थिए ।