एजेन्सी, मंसिर ८ ।
इजरायलले दक्षिणी लेबनान र बेरुत उपनगरमा एकसाथ बमबारी गरेको समाचार बाहिरिएकाे छ । जुन आक्रमणमा परी कम्तीमा पनि ५ जना चिकित्सक मारिएको र बहुउद्देश्यीय भवनसमेत ढलेको छ । त्यहाँको स्वास्थ्य मन्त्रालयले उल्लेख गरेअनुसार दक्षिणी लेबनानमा इस्लामिक स्वास्थ्य संगठनका ५ जना स्वास्थ्यकर्मी मारिएका हुन् । दक्षिणी क्षेत्रमा स्थल सेनाले हिज्बुल्लाह लडाकुसँग भिडन्त गरेको हो ।

लेबनानको राष्ट्रिय समाचार एजेन्सी (एनएनए)ले इजरायली युद्धक विमानले शुक्रबार बेरुतको दक्षिणी उपनगरभित्र दुई वटा भवनलाई निशाना बनाएर आक्रमण गरेका थिए । त्यसरी प्रहार गरिएका मिसाइलमध्ये एक व्यस्त सडकमा भएको भवन र अर्को अपार्टमेन्टको बीचमा खसेको समाचारमा उल्लेख गरिएकाे छ ।