काठमाडाैं, मंसिर १० ।
वगमती प्रदेश सरकारले प्रदेश खेलकुद विकास परिषद्‌को सदस्यमा चार जनालाई नियुक्त गरेको छ ।

प्रदेश सरकारको आज सोमबार बसेको मन्त्रिपरिषद् बैठकले २ महिलासहित ४ जनालाई परिषद्‌को सदस्यमा नियुक्त गर्ने निर्णय गरेको हो ।

बैठकको निर्णयानुसार परिषद्को सदस्यमा आठौँ दक्षिण एशियाली खेलकुद (साग) मा कराँतेका स्वर्ण पदक बिजेता ललितपुरका रवि महर्जन, मकवानपुरका सङ्गित श्रेष्ठ, चितवनकी नबिना खनिया र रामेछापकी कल्पना खड्कालाई नियुक्त गरेको हो । महर्जन नेपाल कराँते महासंघका केन्द्रीय सदस्यसमेत हुन् ।

परिषद्का एक सदस्यको कार्यावधि बाँकी रहेकाले अहिले ४ जनालाई सदस्य नियुक्त गरेको जनाइएको छ ।

सामाजिक विकास मन्त्रालयको सिफारिस तथा युवा तथा खेलकुद मन्त्रालयको सहमतिमा सदस्यहरूको नियुक्ति प्रक्रिया अघि बढाइएको बताइएको छ ।