एजेन्सी, मंसिर १२ ।
हङकङको शेकवाइ कक स्टेटस्थित चेङपेई शान रोडमा बुधबार बिहान भीषण आगलागी भएको छ ।

उक्त सडक खण्डको १ सय ५० मिटर लामो ध्वनि अवरोधक लगाइएको खण्डमा आगो सल्किएको स्थानीय सञ्चारमाध्यमले जनाएकाे छ । यो संरचनाको २० मिटर क्षेत्रलाई आगोले नराम्राेसँग क्षति पुर्‍याएको छ ।

बिहान करिब ११ बजे सुरु भएको आगो निभाउन अग्नि नियन्त्रकको टोलीलाई करिब आधा घण्टाभन्दा बढी समय लागेको थियो । आगो नियन्त्रणका लागि दमकल विभागले दुई वटा वाटर जेट र श्वास-प्रश्वास उपकरणसहित दुई टोली परिचालन गरिएको थियो ।

६ मिटर अग्लो संरचनाको झाडीमा आगो सल्किएको थियो । आगोले जलेका भग्नावशेष सडकमा खसेका थिए । आगलागी भएको यो स्थान शिङमुन सुरुङसँग जोडिएको छ ।

सामाजिक सञ्जालमा साझा गरिएका भिडिओमा एकातिर आगलागी भइरहेको थियो भने सडकको विपरीत छेउबाट केही गाडी लेनहरू अवरुद्ध हुनुअघि जोखिम मोलेर अगाडि बढेको प्रस्ट देख्न सकिन्छ ।

आगलागीका कारण सडकका केही लेन ६ घण्टासम्म बन्द रहेका थिए । चुनकाम इन्टरचेञ्ज जाने लेनहरू भने आपतकालीन मर्मत कार्यका लागि साँझ ६:२३ बजेसम्म बन्द रहेको साउथ चाइना मर्निङ पोस्टमा उल्लेख गरिएकाे छ ।