काठमाडाैं, मंसिर १३ ।
भक्तपुर नगरपालिकाकाे गठ्ठाघरमा ट्रकले स्कुटरलाई ठक्कर दिँदा एक जनाको ज्यान गएको छ भने साेही दुर्घटनामा परी अर्का एक जना घाइते भएका छन् ।

भक्तपुरबाट काठमाडौंतर्फ जाँदै गरेको ना. ८ ख २३११ नम्बरको १२ ट्रकले आज बिहीबार बिहान करिब ७ बजे सोही दिशातर्फ गइरहेको बा. प्र. ०२-०३८ प ४४०१ नम्बरको स्कुटरलाई ठक्कर दिँदा एक महिलाको ज्यान गएको हो ।

ज्यान गुमाउनेमा ४१ वर्षीया नवीना देउला रहेको जिल्ला प्रहरी परिसर भक्तपुरले जनाएको छ । उनको उपचारको क्रममा भक्तपुर इन्टरनेशनल अस्पतालमा आज बिहान पौने ८ बजे मृत्यु भएको हो ।

दुर्घटनामा नवीनाका श्रीमान् जिते देउला घाइते भएका छन् । उनको नागरिक अस्पतालमा उपचार भइरहेको छ ।

ट्रक चालक मकवानपुरगढी-४ का ३८ वर्षीय बुद्ध बहादुर घलानलाई प्रहरी वृत्त ठिमीले नियन्त्रणमा लिएको छ ।