काठमाडाैं, मंसिर १४ ।
जाजरकोटमा एमाले उम्मेदवार सुनिता बोहोरा सवार गाडीमाथि तोडफोड भएको छ । बिहीबार साँझ बोहोरा सवार रहेकाे गाडीमा तोडफोड भएको हो ।

नलगाढ-१ चिउरीमा घरदैलो कार्यक्रमको सिलसिलामा बिहीबार साँझ करिब साढे ७ बजेकाे समयमा उनी सवार गाडीमा ढुङ्गा प्रहार भएको हो । एमाले केन्द्रीय सदस्य तथा भेरी नगरपालिकामा मेयर सीपी घर्तीले बोहोरा सवार गाडी तोडफोड भएको जानकारी दिएका हुन् ।

गाडीमा एमालेको तर्फबाट नलगाड नगरपालिका उपमेयरकी उम्मेदवार बोहाेरा र घर्तीलगायत एमालेका नेताहरू सवार रहेका थिए । नलगाड नगरपालिका दल्लीबाट नलगाड-१, चिउरीतर्फ जाँदै गरेको लु. २ च ६२२४ नम्बरको गाडीमा एक अज्ञात समूहले ढुङ्गा प्रहार गरेको र जीपमा सामान्य क्षति पुगेको घर्तीले बताए । आक्रमणकारी समूह भने ताेडफाेडलगत्तै भागेको उनले जानकारी दिए ।

जिल्ला प्रहरी कार्यालय जाजरकोटका प्रहरी निरीक्षक हरि डाँगीले पनि उम्मेदवार बोहाेरा चुनाव प्रचार-प्रसारमा निस्किएकाे समयमा गाडीमा ढुङ्गा प्रहार भएको बताए । ताेडफाेडपश्चात् घटनाबारे बुझ्न प्रहरी टोली खटिएको उनले जानकारी दिए ।