काठमाडाैं, मंसिर १८ ।
स्थानीय तहको उपनिर्वाचन सम्पन्न भएको छ । जिल्ला समन्वय समिति, नगरपालिका प्रमुख तथा उपप्रमुख, गाउँपालिका अध्यक्ष तथा उपाध्यक्ष र वडाध्यक्ष गरी जम्मा ४४ स्थानका लागि यो उपनिर्वाचन भएकामा सबै स्थानको अन्तिम परिणाम सार्वजनिक भएको छ ।

ओखलढुङ्गा र कैलालीको जिल्ला समन्वय समिति प्रमुखमा कांग्रेस उम्मेदवार निर्विरोध निर्वाचित भएका थिए । त्यस्तै रुकुम पूर्वको पुथा उत्तरगङ्गा गाउँपालिका वडा नं.-२ को वडाध्यक्षमा पनि माओवादी उम्मेदवार निर्विरोध निर्वाचित भएका थिए ।

तीन ठाउँमा निर्विरोध निर्वाचित भएपछि बाँकी ४१ सिटका लागि आइतबार मतदान भएको थियो । मतदान भएकामा दुई वटा नगरपालिका प्रमुख र एउटा गाउँपालिका अध्यक्ष पद थिए । त्यस्तै उपाध्यक्ष एवं उपप्रमुख पद ५ वटामा मतदान भएको थियो । ३३ वटा वडाध्यक्ष पनि मतदानबाटै चुनिएका छन् ।

४४ स्थानमध्ये नेपाली कांग्रेसले १९ ठाउँमा विजय हासिल गरेको छ । दोश्राेमा बढी माओवादीले जितेको छ । उसले ११ वटा सिट जितेको छ । एमालेले ८ स्थानमा जित हासिल गरेकाे छ ।

यस निर्वाचनमा जसपा नेपालले २ स्थान जितेको छ भने नेकपा एकीकृत समाजवादी, नेमकिपा, रास्वपा र स्वतन्त्र उम्मेदवारले एक/एक ठाउँ जितेका छन् । यस निर्वाचनमार्फत् रास्वपाले स्थानीय सरकारमा पहिलो पटक प्रवेश पाएको छ ।

माओवादीले केही आफ्ना पुराना सिट गुमाए पनि नयाँ ठाउँमा जितेर उल्लेख्य सिट बढाएको छ । कांग्रेसले केही नयाँ ठाउँमा जित हात पारे पनि साविकका उल्लेख्य सिट गुमाएको छ । एमालेले केही वडाध्यक्षका पद गुमाएर प्रमुख र उपप्रमुखको पद भने जोडेको छ ।