काठमाडाैं, मंसिर १८ ।
देशभर चिसो बढ्दै गएको छ भने तापक्रम पनि क्रमिक रूपमा घट्दो क्रममा रहेकाे छ ।

आज मंगलबार बिहान पौने ९ बजे काठमाडौंको न्यूनतम तापक्रम ६ दशमलव ६ डिग्री सेल्सियस मापन गरिएको मौसम पूर्वानुमान महाशाखाले जनाएको छ । २०८१ साल लागेयता काठमाडौंमा मापन गरिएको यो अहिलेसम्मकै कम तापक्रम हो ।

सोही समयमा सोमबार काठमाडौंको न्यूनतम तापक्रम ७.० डिग्री सेल्सियस रहेकाे थियो । आइतबार काठमाडौंको न्यूनतम तापक्रम ७.५ डिग्री सेल्सियस मापन गरिएको महाशाखाले जनाएको छ ।

महाशाखाले मंगलबार बिहान सार्वजनिक गरेको देशका १६ स्थानको विवरणमध्ये जुम्लाको न्यूनतम तापक्रम सबैभन्दा कम -४.१ डिग्री सेल्सियस छ । सोमबार जुम्लाको न्यूनतम तापक्रम -३.५ डिग्री सेल्सियस थियो । आइतबार जुम्लाको न्यूनतम तापक्रम -३.१ डिग्री सेल्सियस मापन गरिएको महाशाखाले जनाएको छ ।

मंगलबार ताप्लेजुङको न्यूनतम तापक्रम ६.०, डडेलधुराको ६.५, ओखलढुङ्गाको ७.५, वीरेन्द्रनगरको न्यूनतम तापक्रम ८.० डिग्री सेल्सिय मापन गरिएको छ । सोमबार ताप्लेजुङको न्यूनतम तापक्रम ६.३, डडेलधुराको ७.०, ओखलढुङ्गाको ८.३, वीरेन्द्रनगरको न्यूनतम तापक्रम ७.३ मापन गरिएको महाशाखाले जनाएको छ ।

महाशाखाले हरेक दिन बिहान पौने ९ बजे न्यूनतम र बेलुका पौने ६ बजे मापन गरिएको अधिकतम तापक्रमको विवरण वेबसाइटमार्फत् सार्वजनिक गर्दै आएको छ ।