काठमाडाैं, मंसिर २३ ।
सहकारी ठगी एवं सङ्गठित अपराधसम्बन्धी अनुसन्धानका क्रममा कास्की प्रहरीको हिरासतमा रहेका पूर्वगृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेलाई थप चार दिन हिरासतमा राख्न अदालतले अनुमति दिएको छ ।

म्याद थपका लागि लामिछानेलाई आज आइतबार कास्की जिल्ला अदालतमा उपस्थित गराइएकोमा न्यायाधीश हिमलाल बेलबासेको इजलासले चार दिन म्याद थप्ने अनुमति दिएको कास्की जिल्ला अदालतका सूचना अधिकारी सुरज अधिकारीले जानकारी दिएका छन् ।

गत कात्तिक २ गते काठमाडौंबाट पक्राउ गरी पोखरा लगिएका लामिछाने त्यसयता प्रहरी हिरासतमा नै रहेका छन् । उनलाई त्यसपछि अनुसन्धानकै क्रममा रूपन्देही, काठमाडौं र चितवनसमेत लगेर बयान लिइएको थियो ।