काठमाडाैं, मंसिर २५ ।
काठमाडौं उपत्यकामा आज मंगलबार यस वर्ष २०८१ अन्तर्गत अहिलेसम्मकै चिसो भएको छ ।

मौसम पूर्वानुमान महाशाखाको तापक्रम विवरणअनुसार काठमाडौंको न्यूनतम तापक्रम आज यस वर्षको अहिलेसम्मकै कम ५ दशमलव ५ डिग्री सेल्सियसमा झरेको हो ।

यसअघि यो वर्षभित्र काठमाडौंको न्यूनतम तापक्रम ५ दशमलव ६ डिग्री सेल्सियससम्म मात्र झरेको थियो ।

यही डिसेम्बर १ देखि नेपालमा हिउँद लागेको छ । त्यसैले चिसो बढिरहेको हो ।

काठमाडौंमा यस वर्ष पहिलो हिउँदे वर्षा सोमबार भएको थियो ।

मौसम महाशाखाको सूचीमा आज सबैभन्दा कम न्यूनतम तापक्रम जुम्लामा -६ दशमलव १ डिग्री सेल्सियस रहेकाे छ ।

महाशाखाकाअनुसार आज डडेल्धुराको न्यूनतम तापक्रम पनि माइनसमा झरेको छ । आज बिहान त्यहाँको न्यूनतम तापक्रम माइनस शून्य दशमलव १ डिग्री सेल्सियसमा झरेको महाशाखाले जानकारी दिएको छ ।

मौसमविद्काअनुसार २४ घण्टामा सबैभन्दा कम तापक्रमलाई त्यस दिनको न्यूनतम र सबैभन्दा बढी तापक्रमलाई अधिकतम तापक्रम भनिन्छ ।

न्यूनतम तापक्रम सामान्यतया हरेक दिन बिहान ८:४५ तथा अधिकतम तापक्रम साँझ ५:४५ बजे मापन गरिन्छ । त्यसैले आजको अधिकतम तापक्रम भने साँझ मात्र आउनेछ ।