काठमाडाैं, पुष ३ ।
नेपाल बैंकर्स संघको अध्यक्षमा नेपाल राष्ट्र बैंकबाट ‘क’ वर्गकाे इजाजत पत्र प्राप्त संस्था माछापुच्छ्रे बैंक लिमिटेडका प्रमुख कार्यकारी अधिकृत सन्तोष कोइराला निर्विरोध निर्वाचित भएका छन् ।

संघको आज बुधबार सम्पन्न वार्षिक साधारण सभाले कोइरालालाई आगामी दुई वर्षका लागि अध्यक्षमा चयन गरेको हो । उनी यसअघि उपाध्यक्ष रहँदै आएका थिए ।

संघको उपाध्यक्षमा ग्लोबल आइएमई बैंकका प्रमुख कार्यकारी अधिकृत सुरेन्द्र रेग्मी निर्विरोध चुनिएका छन् । संघका तीन रिक्त सदस्य पदमा पनि निर्विरोध चयन भएको छ । एभरेष्ट बैंकका प्रमुख कार्यकारी अधिकृत सुदेश खालिङ, नेपाल बैंकका प्रमुख कार्यकारी अधिकृत तिलकराज पाण्डे र कुमारी बैंकका प्रमुख कार्यकारी अधिकृत रामचन्द्र खनाल सदस्य चयन भएका हुन् ।

संघको नयाँ कार्यसमितिमा अध्यक्ष कोइराला, उपाध्यक्ष रेग्मी, निवर्तमान अध्यक्ष सुनिल केसी, सदस्यका रूपमा क्रमशः प्रभु बैंकका अशोक शेरचन, नेपाल एसबीआई बैंकका दीपककुमार डे, सानिमा बैंकका निश्चलराज पाण्डे, प्राइम कमर्सियल बैंकका सञ्जीव मानन्धर, एभरेष्ट बैंकका सुदेश खालिङ, सिद्धार्थ बैंकका सुन्दरप्रसाद कँडेल, कुमारी बैंकका रामचन्द्र खनाल, नेपाल बैंकका तिलकराज पाण्डे रहेका छन् ।

त्यस्तै, नबिल बैंकका सीईओ ज्ञानेन्द्र ढुङ्गाना र हिमालयन बैंकका सीईओ अशोक राणा बैंकका सल्लाहकारमा रहेका छन् ।