काठमाडाैं, पुष ३ ।
वैदेशिक रोजगारीमा पठाउने भनी लाखौँ रुपैयाँ ठगी गर्ने दुई जनालाई प्रहरीले पक्राउ गरेको छ ।

काठमाडौं उपत्यका अपराध अनुसन्धान कार्यालय, टेकुका सूचना अधिकारीसमेत रहेका प्रहरी उपरीक्षक काजीकुमार आचार्यकाअनुसार पोल्याण्ड पठाउने भनी ६ लाख ३० हजार रुपैयाँ ठगी गर्ने ३८ वर्षीय राजकुमार चौधरी पक्राउ परेका छन् ।

स्थायी घर धनुषाको गणेशमान चारधाम नगरपालिका-४ भई हाल काठमाडौं गोकर्णेश्वर बस्ने चौधरीले दुई जनाबाट सो रकम लिइ सम्पर्कविहीन बनेको प्रहरीले जनाएको छ ।

यसैगरी, स्थायी घर धनुषा भएर हाल काठमाडौं बस्ने ३९ वर्षीय रुपेशकुमार चौधरीले सिंगापुर पठाउने भनी १६ लाख रुपैयाँ लिई सम्पर्कविहीन बनेको प्रहरीले जनाएको छ ।

प्रहरीकाअनुसार उनीहरूलाई काठमाडौंको विभिन्न स्थानबाट पक्राउ गरी थप अनुसन्धान तथा कारबाहीको लागि वैदेशिक रोजगार विभाग ताहाचलमा पठाइएको छ ।

यस्तै, काठमाडौं जिल्ला अदालत बबरमहलबाट बैंकिङ्ग कसुर मुद्दामा पक्राउ पुर्जी जारी भई फरार रहेका ४० वर्षीय विशाल कुमार चौधरी पनि पक्राउ परेका छन् ।

प्रहरीकाअनुसार चौधरी काठमाडौं जिल्ला अदालतबाट ५० लाख रुपैयाँ बिगो बराबरको मुद्दामा फरार रहेका थिए ।

स्थायी घर कञ्चनपुरको साबिक गाविस वडा नम्बर-३ घर भई हाल काठमाडौं महानगरपालिका वडा नम्बर-२९ अनामनगर बस्ने चौधरीलाई शंखमूलबाट पक्राउ परी आवश्यक कारबाहीका लागि प्रहरी वृत्त महाराजगञ्ज पठाइएको प्रहरीले जनाएको छ ।