काठमाडाैं, पुष ७ ।
वेलकम एड्भरटाइजिङ एण्ड मार्केटिङ्गका अध्यक्ष तथा एड्गुरु एवं गीतकार, गायक निर्मलराज पौडेलले गएकाे केही समयदेखि म्यूजिक भिडियाे सार्वजनिक गर्दै संगीत क्षेत्रमा आफ्नाे बेग्लै पहिचान बनाउँदै दर्शकहरू माझ प्रस्तुत भइरहेका छन् । यसै क्रममा “चिरबिर चरी मायालु परी” नामकाे गीत सार्वजनिक भएको छ । सार्वजनिक उक्त गीतमा गायक पौडेलसँगै गायिका अस्मिता अधिकारीले स्वर दिएकी छन् ।

मोहित मुनालको संगीत रहेको साे गीतमा दिपिका थापाको नृत्य रहेको छ । वेलकम एभी प्रोडक्सनले तयार पारेको म्यूजिक भिडियोलाई मनिष पौडेलले निर्देशन गरेका हुन् । अंग्रेजी नयाँ वर्षको सन्दर्भ पारेर प्रेमिल गीत तयार पारिएको गीतकार पौडेलले जानकारी दिँदै उनले भनेका छन्, “नयाँ पुस्ताको रुचि र भावनालाई समेट्ने प्रयास गरिएको उक्त भिडियो निर्माणमा कुनै पनि सम्झौता गरेका छैनौँ ।”

यसअघि, गीतकार तथा गायक पौडेलको “छम्म नाचौँ – छप्प नाचौँ”, “यसपाली को तीज रमाइलो” र “बडा दशैँ बडा दशैँ, हर्षको आगमन” गीतहरू पनि सार्वजनिक भइसकेका छन् ।