काठमाडाैं, पुष ९ ।
मोरङको जहदा गाउँपालिकामा एक महिला अचेत अवस्थामा फेला परेकी छन् ।

जिल्ला प्रहरी कार्यालय मोरङका प्रहरी उपरीक्षक नारायण चिमरियाले आज मंगलबार बिहान गाउँपालिका-३ जयरामपुरकी २३ वर्षीया महिला अचेत अवस्थामा फेला परेको जानकारी दिएका हुन् ।

माइतीबाट बिहान निस्किएकी महिलालाई स्थानीयले बाँसको झ्याङमा मुखमा कपडा बेरेको र हात खुट्टा बाँधेको अवस्थामा फेला पारेका थिए ।

प्रहरीले घटनाबारे जानकारी पाएसँगै महिलाको उद्धार गरी कोशी अस्पतालमा भर्ना गराएको प्रहरी उपरीक्षक चिमरियाले जानकारी दिए ।

उनले भने, ‘खेतनजिकको बाँसको झ्याङमा महिलालाई अचेत अवस्थामा फेला पारेका हौँ । अहिले अस्पतालमा उपचारका लागि भर्ना गरिएको छ । घटनाबारे अनुसन्धानमा टोली खटिएको छ ।’

परिवारका सदस्यकाअनुसार बिहान महिलाले बाँस झ्याङबाट खेतमा पुगेका मानिसहरूलाई हातले इसारा गरेर उद्धारका लागि आग्रह गरेकी थिइन् । सोही क्रममा स्थानीयले प्रहरीलाई खबर गरी उद्धार गरेका थिए ।