काठमाडाैं, पुष १० ।
नेकपा (एमाले)ले नेता भीम रावललाई पार्टी सदस्यताबाट निष्काशन गरेको छ ।

एमालेको आज बुधबार बसेको सचिवालय बैठकले रावललाई निष्काशन गर्ने निर्णय गरेको उपमहासचिव प्रदीप ज्ञवालीले बताए । एमाले सचिवालय बैठकका निर्णयबारे जानकारी दिँदै रावललाई संगठित सदस्यबाट हटाइएको ज्ञवालीले जानकारी दिएका हुन् ।

“कमरेड भीम रावलले पार्टीलाई बलियो बनाउनेभन्दा कमजोर बनाउने किसिमले अभिव्यक्ति आएको हुनाले उहाँलाई पार्टीको संगठित सदस्यबाट मुक्त गर्ने निर्णय भएको छ,” ज्ञवालीले भने ।

एमालेको गत महाधिवेशनमा रावलले अध्यक्षमा प्रतिस्पर्धा गरेका थिए । उनी पराजित भएका थिए भने केपी शर्मा ओली पुनः अध्यक्षमा निर्वाचित भएका थिए ।

त्यतिबेला एमालेले उपाध्यक्षमा बस्न आग्रह गरेको थियो । रावलले अस्वीकार गरेका थिए । त्यसपछि केन्द्रीय सदस्यमा पनि रावलले नबस्ने जनाएका थिए । उनलाई केन्द्रीय सल्लाहकार समितिमा राखिएको थियो । त्यसमा पनि जिम्मेवारी निर्वाह नगरेको एमाले स्थायी कमिटीको दाबी छ ।

त्यस्तै, एमालेले स्थायी कमिटी सदस्य बिन्दा पाण्डे र उषाकिरण तिमल्सिनालाई पनि कारबाही गरेको छ । दुबै जनालाई ६ महिनाका लागि जिम्मेवारीबाट हटाइएको छ ।

एमाले केन्द्रीय कार्यालय भवन निर्माणको विषयलाई लिएर पाण्डे र तिमल्सिनाले दिएको अभिव्यक्तिलाई लिएर स्पष्टिकरण सोधिएको थियो । त्यसमा दुबै जनाले स्पष्टिकरण दिएपछि चित्त बुझ्दो नभएको ज्ञवालीले बताए ।

ज्ञवालीले भने, “स्पष्टिकरण त दिनुभयो तर, पार्टीको विधिभन्दा बाहिर गएर सार्वजनिक रूपमा बोल्नु भएन भन्ने कुरा महशुस गरेको देखिएन । त्यसैले ६ महिना पार्टीको जिम्मेवारीबाट मुक्त गर्ने निर्णय गरिएको छ ।”