काठमाडौं, पुष १९ ।
जीप दुर्घटनामा परी बझाङमा एकै परिवारका तीन जनासहित जीपमा सवार रहेका चारै जनाको मृत्यु भएको छ । बिहीबार राति तलकोट गाउँपालिकाबाट सदरमुकाम चैनपुर जाने क्रममा धमेनानजिकै से. १ ज ८४३ नम्बरको बोलेरो जीप दुर्घटनामा परी चार जनाको मृत्यु भएको जिल्ला प्रहरी प्रमुख युवराज भण्डारीले जानकारी दिएका छन् ।

उनकाअनुसार तीन जनाको घटनास्थलमा र एक जनाको उपचारका लागि अस्पताल लैजाँदै गर्दा बीच बाटोमा नै मृत्यु भएको हो । जीप चालक केदारस्यूँ गाउँपालिका-१ रायलका अन्दाजी ३३ वर्षीय शमशेर मल्ल, तलकोट गाउँपालिका-४ की ७२ वर्षीया जौमतीदेवी धामी र उनका छोरा ३६ वर्षीय बमबहादुर धामीको घटनास्थलमा नै मृत्यु भएको हो भने धामीकै नातिनी छ वर्षीया बालिका आकृति धामीको जिल्ला अस्पताल बझाङ लैजाने क्रममा मृत्यु भएको प्रमुख भण्डारीले बताएका छन् ।