काठमाडौं, पुष १९ ।
मध्यपुर ठिमी नगरपालिका वडा नं.-९ बोदेस्थित सिन्टीटार टाउन प्लानिङ्गमा आज शुक्रबार साँझ करिब ४ बजेको समयमा फलफूल बोकेर आइरहेको हात्ती गाडीसँग ठोकिएर स्कुटर नराम्रोसँग दुर्घटनामा परेको छ ।

प्रदेश ३-११ ०२५ च ९२७३ नम्बरको हात्ती गाडी र वागमती प्रदेश ०२ ०१८ प ७८२८ नम्बरको स्कुटर दुर्घटनामा परेको हो । स्कुटर तीब्र गतिमा रहेकोले सम्हाल्न नसकेर स्कुटरको करिब आधा भाग गाडीभित्र छिरेको छ । गाडी चालक भने सकुशल रहेका छन् ।

स्थानीय प्रत्यक्षदर्शीहरूको भनाईअनुसार दुर्घटनामा परेको स्कुटरमा तीन जना बालकहरू सोही आसपासका क्षेत्रमा बिना हेल्मेट दुई तिन पटक घुमिरहेका थिए । स्थानीयकाअनुसार स्कुटरमा सवार बालकहरूको उमेर करिब १३ देखि १५ वर्षका रहेका छन् । उनीहरू मध्ये एक जनाको टाउकोमा, एक जनाको निधार र आँखामा चोट लागेको छ भने एक जनाको गालामा नराम्रोसँग घिस्रिएको जनाएको छ ।

गाडी चालक अन्दाजी २७ वर्षका रहेका छन् । उनी घटनास्थलमा नै रहेका छन् भने उनी अहिले प्रहरीको निगरानीमा रहेका छन् । घाइतेहरूको नेपाल कोरिया मैत्री अस्पताल ठिमीमा उपचारपश्चात् दुई जनाको अवस्था नाजुक रहेकोले एक जनालाई ठिमी र एक जनालाई नर्भिक अस्पताल रिफर गरिएको छ ।