काठमाडौं, माघ २४ ।
प्रधानमन्त्री पुष्पकमल दाहालको कार्यप्रति असन्तुष्ट पोख्दै अबको दुई महिनाभित्र सरकार परिवर्तन गरी आफैँले तीन वटै तहको निर्वाचन गर्ने बताएका नेपाली कांग्रेसका सभापति शेरबहादुर देउवाले प्रमुख दलहरूसँगको भेटघाटलाई थप तीब्रता दिँदै अघि बढेका छन् ।

बुढानीलकण्ठस्थित आफ्नै निवासमा आईतबार मधेशी मोर्चाका नेताहरूसँग विस्तृत छलफल गरी संविधान कार्यान्वयनका लागि संशोधन प्रस्ताव पारित गरेर मात्र निर्वाचनमा जाने बताउँदै सो कार्यमा सघाउन मधेशी नेताहरूलाई आग्रहसमेत गरेका छन् ।

सभापति देउवाले आईतबारै प्रमुख विपक्षी दल नेकपा (एमाले)का अध्यक्ष केपी शर्मा ओलीसँग टेलिफोन वार्ता गरी सिधैँ प्रधानमन्त्रीको सरकारी निवास बालुवाटार हानिएका उनले प्रम दाहालसँग पनि परामर्श गरेका छन् ।

मोर्चाका नेताहरूसँगको भेटमा सभापति देउवाले व्यक्त गरेको भनाईलाई उद्धृत गर्दै श्रोतले भने, ‘मोर्चासँग भएको तीन बुँदे सहमतिको हस्ताक्षरकर्ता म पनि भएकाले त्यसको कार्यान्वयन मेरो प्रतिबद्धता हो । यथाशीघ्र संशोधन पारित गरी निर्वाचनमा जानुपर्छ ।’ प्रमुख प्रतिपक्षी एमालेले संशोधन विधेयकको विरोध गरिरहेका बेला कांग्रेस सभापति देउवाले विधेयकलाई यथाशीघ्र पारित गराउन आ–आफ्नोतर्फबाट भूमिका निर्वाह गर्ने प्रतिबद्धतासमेत जनाए । उनले मधेशी मोर्चाको मागप्रति आफू इमानदार रहेको बताउँदै उनले भने, ‘मधेशी मोर्चाको जायज मागलाई पूरा गर्नुपर्छ । पहिला संविधान संशोधन विधेयक पारित गरी चुनावमा जानुपर्छ । यसमा मोर्चाले पनि साथ दिनुपर्छ ।’

सभापति देउवाले प्रमुख विपक्षी दल एमाले र मधेशी मोर्चासँगको छलफललाई थप तीब्रता दिएसँगै प्रचण्ड सरकार धुलमलिँदै गएको छ भने कांग्रेस पार्टीभित्र सभापति देउवालाई प्रधानमन्त्री बनाउन भित्रभित्रै कसरत सुरु भएको श्रोतले बताएको छ ।