काठमाडाैं, माघ २ ।
पश्चिमी वायुको प्रभावले देशभर मौसममा आंशिक बदली भएको छ । काठमाडौं उपत्यकासहित देशका धेरै स्थानमा अहिले मौसममा सामान्यतया बदली रहेको छ ।

कोशी, वागमती, गण्डकी, कर्णाली र सुदूरपश्चिमका उच्च पहाडी र हिमाली क्षेत्रका थोरै ठाउँमा आज बुधबार बेलुका हल्का वर्षासँगै हिमपातको सम्भावना रहेको जल तथा मौसम पूर्वानुमान महाशाखाले जनाएको छ ।

पानी पार्ने प्रणाली ठूलो नभएकाले धेरै प्रभाव नदेखिने महाशाखाका मौसमविद् प्रतिभा मानन्धरले बताइन् । उनकाअनुसार तराईका केही ठाउँमा अहिले हुस्सु/कुहिरो लागेको भए पनि दिउँसो हट्दै जानेछ । अन्य भागमा आजको मौसम मुख्यतया सफा रहने अनुमान छ ।