काठमाडाैं, माघ २ ।
बिर्तामोडको एक ग्यारेजमा आगलागी भएको छ । आगलागीबाट ग्यारेजमा मर्मत सम्भारका लागि राखिएका तीन वटा बसमा क्षति पुगेको जिल्ला प्रहरी कार्यालय झापाले जनाएको छ ।

आज बुधबार बिहान करिब साढे १० बजेकाे समयमा बिर्तामोड-५ स्थित पश्चिम बस स्टेसननजिक रहेको ग्यारेजमा निदि क्याम्पसको मे. १ ख ३३४५ नम्बरको बसमा मर्मत गर्ने क्रममा अचानक विद्युत् सर्ट भएर आगलागी भएको थियो । आगलागीबाट क्याम्पसको बस पूर्ण रूपमा जलेर नष्ट भएको छ ।

त्यस्तै, सोही ग्यारेजमा बनाउन ल्याएको मे. १ ख २२१५ नम्बरको मातृ भाग्य रेखा बसको अगाडीको भाग र प्र. १-०१-००१ख ४१२६ नम्बरको बसको पेन्टिङ जलेर क्षति पुगेको प्रहरीले जनाएको छ ।

तीन वटा गाडी जल्दा अन्दाजी २१ लाख रुपैयाँ बराबरको क्षति भएको छ । बसमा लागेको आगो बिर्तामोड नगरपालिकाको दमकल, नेपाल प्रहरी र स्थानीयबासीको सहयोगमा नियन्त्रणमा लिइएको थियो ।