काठमाडाैं, माघ १८ ।
दाङमा कुखुरा बोक्ने गाडीको ठक्करबाट एक जनाको मृत्यु भएको छ । मृत्यु हुनेमा बबई गाउँपालिका-३ पुरन्धारा निवासी ४५ वर्षीया फुलबारी चौधरी रहेको वडा प्रहरी कार्यालय लमहीका प्रहरी निरीक्षक प्रकाश भुषालले जानकारी दिएका छन् ।

आज शुक्रबार बिहान ११ बजेर ५० मिनेटको समयमा सतबरियादेखि लमहीतर्फ जाँदै गरेको ल. ३ च ३०९० नम्बरको ब्रोइलर कुखुरा बोक्ने गाडीले ठक्कर दिएको प्रहरीले जनाएकाे छ ।

दाङको पुरन्धाराबाट लमही नगरपालिका-७ कप्तानगञ्ज आफन्तकोमा आएर घर फर्किनका लागि सडक किनारमा बस कुरेर बसेको बेला गाडीले ठक्कर दिएको थियो ।

घाइते हुनेमा लमही नगरपालिका-७ नयाँ बस्ती बस्ने वर्ष ६२ की फुलपतिया चौधरी र सोही ठाउँ बस्ने वर्ष ६५ की उदेसनी चौधरी रहेका छन् ।

गाडी चालक लमही नगरपालिका-६ मध्यनगर निवासी वर्ष ३९ का देवलाल चौधरीलाई प्रहरीले नियन्त्रणमा लिइसकेकाे छ ।