काठमाडाैं, फागुन ११ ।
नारायणगढ-मुग्लिन सडकखण्डअन्तर्गत चितवनको इच्छाकामना-५ स्थित ३ नम्बर पुलबाट मोटसाइकल दुर्घटना भई त्रिशुली नदीमा बेपत्ता भएका युवकको शव फेला परेको छ ।

लमजुङको साविक चन्द्रेश्वर गाविस-३ घर भई हाल चितवनको भरतपुर महानगरपालिका-१ रामनगर बस्ने वर्ष २७ को रोहित रानाको शव ९ दिनपछि आज आइतबार बिहान फेला परेको हो । ईलाका प्रहरी कार्यालय मुग्लिनका प्रमुख प्रहरी निरीक्षक निरला भण्डारीकाअनुसार दुर्घटना भएको करिब एक सय मिटर तल नदीमा तैरिरहेको अवस्थामा शव फेला परेको हो ।

रानाको शवलाई सशस्त्र प्रहरी र नेपाल प्रहरीको संयुक्त टोलीले नदीबाट उद्धार गरी शव परीक्षणका लागि भरतपुर अस्पताल पठाइएको प्रहरी निरीक्षक भण्डारीले बताए । निरीक्षक भण्डारीकाअनुसार रोहितका परिवारले शव सनाखत गरिसकेका छन् ।

यही फागुन २ गते नारायणगढबाट काठमाडौंतर्फ आउँदै गर्दा रोहित सवार बा. ०६-०२ प ९२०४ नम्बरको मोटरसाइकल दुर्घटना भएको थियो । मोटरसाइकल सडकमै अडिएको थियो भने रोहित त्रिशुलीमा खसेका थिए । रोहित भारतीय सेनामा कार्यरत रहेका थिए ।