काठमाडाैं, फागुन २० ।
मोरङको मौलिबारीमा महिला र पुरुष मृत फेला परेका छन् । पथरीशनिश्चरे नगरपालिका-५ स्थित मौलिबारीमा छुट्टाछुट्टै परिवारका महिला र पुरुष मृत फेला परेको मोरङका प्रहरी प्रमुख एसपी नारायण चिमोरियाले जानकारी दिएका छन् ।

२२ वर्षका अजय टुरु र मोरङकै कटहरी माइती भएकी झापाको गौरीगञ्जकी जुबामुनी हस्दा मृत भेटिएको वडा अध्यक्ष चेजेन्द्र खड्काले जानकारी दिए ।

गएराति २ बजे पुरुष घरबाट हिँडेको जानकारी आएको र उनी महिलासँग एउटै रुखमा झुण्डिएको अवस्थामा फेला परेकाे खड्काले बताए । मृतक पुरुष सोही वडाका हुन् भने महिला बाहिरकी हुन् ।

दुबै विवाहित रहेको र दुबैका सन्तानसमेत रहेको खड्काले बताए । महिलाका श्रीमान् वैदेशिक रोजगारीमा रहेको पनि खड्काले बताए । घटनाबारे विस्तृत विवरणका लागि प्रहरी घटनास्थलमा पुगेको छ भने थप विवरण खुल्न बाँकी रहेको प्रहरीले जनाएको छ ।