काठमाडौं, फागुन २४ ।
नेपाल राष्ट्र बैंकबाट ‘क’ वर्गको इजाजत पत्र प्राप्त संस्था नबिल बैंक लिमिटेडले अन्तर्राष्ट्रिय नारी दिवसका अवसरमा वाकाथनको आयोजना गरेको छ । ‘वुमन इन मोसन–एक्सलेरेट एक्सन’ शीर्षकमा महिलाको सहनशीलता, उपलब्धि र योगदानको उत्सव मनाउने उद्देश्यका साथ बैंकले वाकाथनको आयोजना गरेको हो ।

बैंकको केन्द्रीय कार्यालयमा वाकाथनको सुरुवात गर्दैै बैंकका अध्यक्ष उपेन्द्रप्रसाद पौडेलले दिवसको अवसरमा महिलाहरूलाई शुभकामना दिँदै बैंकले महिलाहरूलाई प्राथमिकता दिएको बताउँदै उनले बैंकका विभिन्न विभागमा महिलाहरूले नेतृत्व गरिरहेको उल्लेख गर्दै बैंकको विकासमा महिलाहरूको भूमिका महत्वपूर्ण रहेको बताए ।

बैंकका प्रमुख कार्यकारी अधिकृत (सीईओ) ज्ञानेन्द्रप्रसाद ढुंगानाले बैंकले आज शनिबार मात्रै नभई मार्च महिनाभरी नै विभिन्न कार्यक्रमको आयोजना गरी महिला दिवस मनाउन गइरहेको जानकारी दिए । “महिलाहरू पनि नेतृत्वका लागि अगाडि आउन जरुरी छ, त्यसका लागि बैंकले विभिन्न क्षेत्रमा अवसरहरू उपलब्ध गराउनका लागि सदैव तयार छ”, उनले भने ।

बैंककाअनुसार दिवसका अवसरमा विभिन्न १२ स्थानबाट एकैसाथ वाकाथन सुरु गरिएको थियो । काठमाडौं, विराटनगर, बिर्तामोड, जनकपुर, वीरगञ्ज, पोखरा, नेपालगञ्ज, तुलसीपुर, सुर्खेत, धनगढी, बुटवल र नारायणगढमा भएको वाकाथनमा बैंकमा कार्यरत १२ सयभन्दा बढी कर्मचारीहरूको सहभागिता रहेको थियो । उक्त कार्यक्रमले लैंगिक समानताका पक्षमा सन्देश प्रवाह गर्दै समावेशी समाज निर्माणका लागि सकारात्मक परिवर्तन ल्याउनेमा बैंकले विश्वास व्यक्त गरेको छ ।

पुरुषहरूको सहभागितासँगै हिँड्नु मात्रै नभई समाजमा व्याप्त पुरानो सोच र विभेद्को अन्त्यका लागि पनि जरुरी रहेको वाकाथनमा सहभागीहरूले बताए ।

नबिल बैंक नेपालको अग्रणी वाणिज्य बैंकहरूमध्ये एक हो । बैंकले २४ लाखभन्दा बढी सेवाग्राहीलाई २ सय ६८ वटा शाखा र ३ सय २० वटा एटीएममार्फत् सेवा प्रदान गर्दै आइरहेको छ । नबिल बैंकले विगत ४० वर्षदेखि नेपाली बैंकिङ्ग क्षेत्रमा नवीनतम सेवाहरूको सुरुवात गर्दै महत्वपूर्ण भूमिका खेलेको छ । बैंकले नेपालको बैंकिङ्ग विकासमा महत्वपूर्ण योगदानसमेत पुर्‍याउँदै आइरहेको बैंकले एक प्रेस विज्ञप्ति जारी गरी जनाएको छ ।