काठमाडाैं, फागुन २५ ।
आईजिआई प्रुडेन्सियल इन्स्योेरेन्स लिमिटेडको २७ औँ वार्षिक साधारण सभा आज आइतबार अम्रपाली बैङ्क्वेट, भाटभटेनी, नक्शाल, काठमाडौंमा सम्पन्न भएको छ ।

साधारण सभामा सम्पूर्ण शेयरधनी महानुभावहरूलाई हार्दिक स्वागत गर्दै अध्यक्ष हेमराज ढकालले बीमा नागरिकको जीवनसँग प्रत्यक्ष रूपमा जोडिएको हुन्छ । जीवनमा आइपर्ने विपद् र जोखिम अनपेक्षित र अनिश्चित हुने गर्छन् । आफूले दुःख गरेर आर्जन गरेको सम्पत्ति होस् या कुनै व्यावसाय सम्भावित जोखिम न्यूनीकरण गर्ने सबैभन्दा भरपर्दो माध्यमनै निर्जीवन बीमा हो र यसै यथार्थलाई मध्यनजर गर्दै विगत दुई दशकभन्दा लामो समयदेखि यस आइजिआई प्रुडेन्सियल इन्स्योरेन्सले नागरिकको जीवनमा आईपर्ने यस्तै अनेकौँ जोखिमहरूको न्यूनीकरण गर्न सहजकर्ताको भूमिका खेलिरहेको छ भने समग्र अर्थतन्त्रमा नै महत्वपूर्ण योगदान पुर्‍याउँदै आइरहेको जानकारी दिएका छन् ।

सोही अवसरमा ढकालले समीक्षा वर्षमा निर्जीवन बीमा कम्पनीहरूले रु. ४१.४७ अरब बीमा शुल्क आर्जन गरेका छन् जुन गत आ.व. भन्दा २.८ प्रतिशतको वृद्धि हो । साथै आ.व. २०८०।०८१ मा कूल ग्राहस्थ उत्पादनमा निर्जीवन बीमा क्षेत्रको ०.७३ र कूल बीमा क्षेत्रको ३.४७ प्रतिशत योगदान रहेको छ । सो सुचकांकले बीमा क्षेत्रको विकासमा प्रचुर सम्भावना रहेको प्रष्ट देखिएको जानकारी गराउँदै समीक्षा वर्षमा यस कम्पनीले ३.६३ अरब बीमा शुल्क आर्जन गरी गत वर्षको दाँजोमा ७.१२ प्रतिशतले वृद्धि गर्न सफल भएको जानकारी गराएका छन् ।

त्यसैगरी, कम्पनीले आर्थिक वर्ष २०८०।०८१ को वितरण योग्य मुनाफा तथा गत आर्थिक वर्षको संचित मुनाफाबाट शेयरधनीहरूलाई चुक्ता पूँजीको ९.७३६८ प्रतिशतका दरले हुन आउने रकम रु. २९ करोड ४९ लाख ६१ हजार ५ सय ३० (कर प्रयोजनार्थसहित) नगद लाभांश सभाबाट पारित भएको जानकारी गराए ।

कम्पनीको आफ्नै जग्गामा निर्माणाधिन ११ तल्लाको भवन निर्माणको कार्य अन्तिम चरणमा पुगेको, भवनको सम्पूर्ण कार्य करिब ६ महिनाभित्र सकिने अपेक्षा रहेको र यसैगरी कम्पनीले आगामी वर्षदेखि विभिन्न प्रदेशमासमेत आफ्नै भवनको अवधारणा अगाडि सारेको र सोलाई क्रमश: व्यवस्था गर्दै लगिने व्यहोरासमेत शेयरधनी महानुभावहरूलाई जानकारी गराए । कम्पनीले २७ औँ साधारण सभा समक्ष पेश गरेको सबै साधारण तथा विशेष प्रस्तावहरू सभाले कर्तल ध्वनीका साथ स्वीकृत गरेकोमा सबै शेयरधनीहरूलाई धन्यवाद व्यक्त गरे ।

त्यसैगरी, सोही अवसरमा कम्पनीका प्रमुख कार्यकारी अधिकृत युगेशभक्त बादे श्रेष्ठले कम्पनीको २७ औँ वार्षिक साधारण सभामा सम्पूर्ण शेयरधनी महानुभावहरूलाई स्वागत गर्दै कम्पनीले आफ्ना ग्राहक महानुभावहरू, लगानीकर्ता, नियमनकारी निकायहरू र सहकर्मी साथीहरूको टीमको सहयोगबाट आज बीमा बजारमा एक अग्रणी कम्पनीको रूपमा स्थापित भइरहेको जानकारी गराए । यसलाई निरन्तरता प्रदान गर्न कम्पनी सदा तत्पर रहने बाचा व्यक्त गरे । लगानीकर्ताहरूको भावना र सञ्चालक समितिको निर्देशनले अगाडि बढिरहेको जानकारी गराए ।

बीमाको पहुँचलाई देशको सबै क्षेत्रमा पुर्‍याउने हेतुले हामीले सातै वटै प्रदेशमा रहेका ६९ वटा शाखा तथा उपशाखा र १४ वटा सेवा काउण्टरहरू गरी ८३ स्थानमा आफ्नो बलियो उपस्थितिसहित ५०१ जना कर्मचारीहरू रहेका छन् भने ४५.७९ प्रतिशत महिला कर्मचारी रहेको, ४०० अभिकर्ताहरू र १९१ सर्भेयरहरूमार्फत् आफ्ना ग्राहक महानुभावहरूलाई सेवा प्रदान गरिरहेको जानकारी गराए । कम्पनीले गत आर्थिक वर्ष २०७९।०८० मा हासिल गरेको बीमा प्रिमियम रकम रु. ३ अरब ३९ करोड ४५ लाखमा ७.१२ प्रतिशतले वृद्धि गरी समीक्षा वर्षमा रु. ३ अरब ६३ करोड ६१ लाख बीमा प्रिमियम संकलन गर्न सफल भएको छ । त्यसैगरी, नेपाल सरकारलाई गत आ.व.मा विभिन्न कर बापत कूल रु. ५९ करोड २८ लाख भुक्तानी गरेकोमा समीक्षा वर्षमा ३५.८० प्रतिशतले वृद्धि गरी रु. ८० करोड ५० लाख राष्ट्र निर्माणमा ठूलो योगदान पुर्‍याएको व्यहोरा शेयरधनी महानुभावहरूलाई जानकारी गराए ।

श्रेष्ठले कम्पनीले हालसम्म प्राप्त गरेको उपलब्धिलाई संस्थागत गर्दै कम्पनीको नीति, नियम र विनियमहरू, आन्तरिक लेखा परीक्षणलगायत बीमा प्राधिकरणबाट समय-समयमा प्राप्त निर्देशनहरूको पालना गर्दै आन्तरिक नियन्त्रण प्रणालीलाई प्रभावकारी बनाउँदै कम्पनीसँग भएको साधन र श्रोतको उच्चतम परिचालन गरी सबै शाखा तथा प्रधान कार्यालयबाट सहज सेवा प्रदान गर्ने गरी सूचना तथा संचारमा विशेष ध्यान दिएका छौँ । नेपाल बीमा प्राधिकरणलगायत कम्पनीको नियमनकारी निकायहरूबाट समय-समयमा जारी हुने निर्देशनलाई विषेश महत्वका साथ परिपालन गर्दै कम्पनी अगाडि बढिरहेको छ । त्यसैगरी, चुक्ता पूँजीको अनुपातमा कम्पनीले बीमा बजारमा आफ्नो स्थानलाई सुरक्षित गर्ने गरी गुणस्तरीय व्यावसायमा विषेश ध्यान दिँदै आएको जसबाट चालु आ.व.मा निर्जीवन बीमा बजारमा कम्पनी चौथो स्थानमा रहेको र यसलाई अझै स्तरोन्नति गर्दै लाने गरी कार्यहरू भइरहेको व्यहोरासमेत जानकारी गराए ।

अन्तमा सञ्चालक समितिका अध्यक्ष हेमराज ढकालले कम्पनीको २७ औँ वार्षिक साधारण सभामा भाग लिई अमूल्य सुझावहरू दिनुहुने हाम्रा आदरणीय शेयरधनी महानुभावहरूको आत्मीयता, न्यानो माया र विश्वासप्रति आभार प्रकट गर्दै नेपाल सरकारका विभिन्न निकायहरू, नेपाल बीमा प्राधिकरणलगायत नियमक निकायहरू तथा ग्राहक महानुभावहरूप्रति धन्यवाद व्यक्त गरेका हुन् ।