काठमाडाैं, चैत ७ ।
बलात्कार मुद्दाका एक थुनुवा ललितपुर महानगरपालिकाको पाटन अस्पतालबाट फरार भएका छन् ।

प्रहरी वृत्त सातदोबाटोको हिरासतमा रहेका थुनुवा अछाम घर भएका दीपक साउद बुधबार दिउँसो फरार भएका हुन् । थुनुवा साउद बिरामी भएपछि उपचारका लागि भन्दै पाटन अस्पताल लगिएको थियो ।

सोही क्रममा शौचालय जाने भनेर छिरेका उनी दिउँसो ११ बजेतिर फरार भएका हुन । उनी झ्यालबाट हाम फालेर भागेको बताइएको छ ।

फरार थुनुवाको खोजी भइरहेको जिल्ला प्रहरी परिसर ललितपुरका एसपी तथा प्रवक्ता नरहरी रेग्मीले बताए । ‘शौचालय जाने निहुँ बनाएर भागेको देखिएको छ । घटनाबारे अनुसन्धान गर्दैछौँ,’ एसपी रेग्मीले भने ।

१९ वर्षका साउद १७ वर्षकी किशोरीसँग लिभिङ टुगेदरमा बस्दै आएका थिए । ती किशोरीले केही समयअघि बच्चासमेत जन्माएकी थिइन् ।

विवाह गर्ने उमेरसमेत नहुँदा आफूखुसी विवाह गरेर बच्चासमेत जन्माएको अवस्था रहेको प्रहरीको भनाई छ । आफूलाई बेवास्ता गर्न थालेपछि १७ वर्षीया किशोरी बच्चाकी आमाले उनीविरुद्ध बलात्कार जाहेरी दिएकी थिइन् । त्यसपछि साउद पक्राउ परेका हुन् ।