काठमाडाैं, चैत १२ ।
नेपाल विद्युत प्राधिकरणका पूर्वकार्यकारी निर्देशक कुलमान घिसिङलाई हटाएको विरोधमा आज मंगलबार अखिल क्रान्तिकारीले काठमाडौंको बागबजारमा मसाल जुलुससहित प्रदर्शन गरेको छ ।

मंगलबार साँझ आयोजित प्रदर्शनमा क्रान्तिकारी विद्यार्थीहरूले मसाल बोकेर प्रधानमन्त्रीविरुद्ध नाराबाजी गरेका थिए । उनीहरूले प्रधानमन्त्रीको पुत्ला दहन गर्दै कुलमान घिसिङलाई पुनः नियुक्त गर्न माग गरेका छन् ।

अखिल (क्रान्तिकारी) का नेताहरूले कुलमान घिसिङलाई हटाउनु जनतामाथिको अन्याय भएको भन्दै सरकारको निर्णय तत्काल सच्याउन चेतावनीसमेत दिएका छन् ।

उनीहरूले विद्युत सुधारमा घिसिङको योगदान उल्लेखनीय रहेको भन्दै सरकारको निर्णयलाई ‘दलीय पूर्वाग्रही’ करार गरेका छन् ।

प्रदर्शनका क्रममा विद्यार्थीहरूले ‘कुलमानलाई पुनः नियुक्त गर’, ‘प्रधानमन्त्री मुर्दाबाद’, ‘विद्युत सुधार गर्ने नेतृत्व चाहिन्छ’ जस्ता नाराहरू लगाउनुको साथै प्रधानमन्त्री केपी शर्मा ओलीको पुत्लासमेत दहन गरेका थिए ।

कार्यक्रममा क्रान्तिकारी विद्यार्थी नेताहरूले यदि कुलमानलाई पुनः नेतृत्वमा ल्याइएन भने थप आन्दोलन गर्ने चेतावनीसमेत दिएका छन् ।