काठमाडाैं, चैत १४ ।
भाेलि शुक्रबार काठमाडौंको प्रदर्शनी मार्ग र तीनकुने क्षेत्रमा दुई फरक समूहले व्यापक प्रदर्शनकाे तयारी गरेकाे छ । जसमा गणतन्त्र पक्षधरकाे तर्फबाट समाजवादी मोर्चा र पूर्वराजा समर्थकहरूले एकै दिन व्यापक प्रदर्शनको घोषणा गरेपछि सुरक्षा व्यवस्थालाई थप कडा पारिएको छ ।

समाजवादी मोर्चामा आबद्ध नेपाल कम्युनिष्ट पार्टी (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपाले प्रदर्शनी मार्गको भृकुटी मण्डपमा प्रदर्शन गर्ने भएका छन् । मोर्चाले बबरमहलबाट माइतीघर, त्रिपुरेश्वर हुँदै प्रदर्शनीमार्गसम्म जुलुस निकाल्ने योजना बनाएको छ । काेपुण्डोलमा भेला भएर त्रिपुरेश्वर हुँदै प्रदर्शनीमार्ग पुग्ने रुट तय गरिएको छ । सोह्रखुट्टेबाट पकनाजोल र जमल हुँदै त्रिचन्द्रसम्म जुलुस निकाल्न जिल्ला सुरक्षा समितिले अनुमति दिएको छ । मोर्चाले प्रदर्शनमा १ हजार स्वयंसेवक परिचालन गर्ने जानकारी दिएको छ ।

अर्कोतर्फ, मेडिकल व्यावसायी दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ र नवराज सुवेदी नेतृत्वको ‘राजसंस्था पुनर्स्थापनाका लागि संयुक्त जनआन्दोलन समिति’ले तीनकुनेमा प्रदर्शन गर्दै छन् । सुवेदी समूहले प्रदर्शनस्थल सार्वजनिक नगरे तापनि प्रसाईंसँग मिलेर शक्ति प्रदर्शन गर्ने अनुमान गरिएको छ । प्रहरीले पूर्वराजा समर्थकलाई चक्रपथ बाहिर मात्र जुलुस निकाल्न दिने रणनीति बनाएको छ । चाबहिलबाट तीनकुने र सातदोबाटो हुँदै तीनकुनेसम्म जुलुस निकाल्न अनुमति दिइएको छ । भक्तपुरबाट आउने समर्थकलाई तीनकुनेमा रोकिने व्यवस्था गरिएको छ ।

यसैबीच, सम्भावित मुठभेड रोक्न उपत्यका प्रहरी कार्यालयले ठूलो संख्यामा प्रहरी परिचालन गर्ने योजना तयार गरिसकेकाे छ । प्रहरी वरिष्ठ उपरीक्षक (एसएसपी) विश्व अधिकारीको कमाण्डमा ३ हजार ५ सय प्रहरी खटाइने भएका छन् । प्रदर्शनस्थलमा एसपी अपिलराज बोहरा नेतृत्वको टोलीले सुरक्षा व्यवस्थापन गर्नेछ । भद्रकालीस्थित जिल्ला प्रहरी परिसर काठमाडाैंमा ‘कमाण्ड सेन्टर’ स्थापना गरिएको छ, जहाँ प्रमुख जिल्ला अधिकारी ऋषिराम तिवारी, एसएसपी विश्व अधिकारी र सशस्त्र प्रहरी बलका प्रतिनिधिले निगरानी तालिका तय गरिएकाे छ ।

उपत्यका प्रहरी कार्यालयका प्रवक्ता एसएसपी शेखर खनालले भने, “मुठभेड रोक्न समाजवादी मोर्चाका समर्थकलाई कोटेश्वरबाट बालकुमारी पुल हुँदै भित्री बाटोबाट प्रदर्शनीमार्ग पठाउँछौँ । आवश्यकताअनुसार एसएसपी अधिकारी फिल्डमा गएर सुरक्षा व्यवस्थापन गर्नेछन् ।” अवैध गतिविधि नियन्त्रण गर्न सादा पोसाकका प्रहरी पनि परिचालन गरिने उनले बताए ।

प्रहरीले समाजवादी मोर्चा र पूर्वराजा समर्थकको जुलुसलाई छुट्टाछुट्टै राख्न रुट डाइभर्सनको योजना बनाएको छ । भक्तपुरबाट आउने समाजवादी मोर्चाका समर्थकलाई कोटेश्वरबाट बालकुमारीतर्फ डाइभर्ट गरिनेछ । पूर्वराजा समर्थकलाई चक्रपथ बाहिर सीमित गरिनेछ । सुरक्षा निकायले सूचना संकलनका लागि सादा पोसाकमा प्रहरी खटाउने रणनीति बनाएको छ ।