एजेन्सी, जेठ १५ ।
बेहुलालाई अपहरण गरेर उसैसँग जबर्जस्ती बिहे ! बेहुलीको एकतर्फी प्रेमको यो हदले आम सर्वसाधारणलाई आश्चर्य चकित बनाएको छ ।

यो भारत बिहारको मुजफ्फरपुर जिल्लाको घटना हो । त्यहाँ केटी पक्षले केटालाई अपहरण गरेर जबर्जस्ती बिहे गराइदिएको घटना सार्वजनिक भएको छ ।

मुजफ्फरपुरको मैठी गाउँको कुनकुन सिंहको छोरा अभिनवको बिहे गायघाट गाउँको पछियारी टोलका नन्दकिशोर सिंहकी छोरी जुली सिंहसँग हुँदै थियो । यसबीचमा केटा अपहरण परेको सूचना सार्वजनिक भएपछि प्रहरीले बेहुलीको घरमा छापा मारेको थियो । सो क्रममा बेहुली पक्ष र प्रहरीबीच झडप भएको थियो ।

प्रहरीले बेहुली जुली र उनकी बहिनीसमेत गरी चार जनालाई पक्राउ गरेको छ । जुली हाल प्रहरीको न्यायिक हिरासतमा छिन् र उनको मुजफ्फरपुर जिल्लाको सदर अस्पतालमा उपचार भइरहेको छ ।

जुलीले बिहेको बेला बेहुला पक्षका कोही पनि त्यहाँ उपस्थित नभएको स्वीकार गरेकी छन् । उनले बेहुलालाई अपहरण गरेर बिहे गराएको भन्ने आरोपको खण्डनसमेत गरेकी छन् ।

उनले भनिन् ‘बेहुला आफै आफ्नै मर्जीले बिहे गर्न आएका थिए । उनले बिहेपछि आफ्ना घरका सदस्यहरूलाई यो कुराको जानकारी दिने तयारीमा थिए ।’

जुलीले यो आरोप पनि लगाएकी छन् कि, ‘२५ तारिखको राति प्रहरीले हाम्रो कुनै कुरा सुनेन र निर्ममतापूर्वक हामीलाई कुटपिट पनि गर्‍यो ।’ गत बिहीबारको यो घटना भारतीय सन्चारमाध्यमहरूमा निकै चर्चामा रहेको छ ।

घटनाबारे मुजफ्फरपुर जिल्लाका वरिष्ठ एसपी विवेक कुमार भने प्रहरी अनुसन्धानको क्रममा केटाको अपहरण गरेर जबर्जस्ती बिहे गराएको भन्ने कुरा सही पाइएको छ । यसबारे बेहुला पक्षका परिवारका सदस्यहरूको प्रतिक्रिया नआएको जनाएको छ ।

बिहारमा हरेक वर्ष बिहेको लागि केटाको अपहरण भएका सयौं घटनाहरू सार्वजनिक हुने गर्दछन् । बिहार प्रहरीको तथ्यांकअनुसार सन् २०१६ मा यस्ता तीन हजारभन्दा बढी उजुरी परेका छन् । सन् २०१७ को मार्च महिनामामात्रै यस्ता घटनाका ८३० उजुरी दर्ता भएका छन् ।