काठमाडौं, माघ २६ ।
निर्वाचन आयोगले अबको निर्वाचनमा विद्युतीय यन्त्र प्रयोग गर्ने तयारी गरेको छ । आयोगले कम्तीमा एउटा प्रदेशमा विद्युतीय यन्त्रबाट मतदान गराउन सकिनेबारे दल र सरकारसँग छलफल गरिरहेको छ । आयोगले दलका शीर्ष नेतालाई विद्युतीय यन्त्रबारे मंगलबार जानकारी गराउँदै नमूना मतदान पनि गराएको छ । आयोगले प्रदर्शनी गराएको विद्युतीय यन्त्रलाई ‘स्मार्टम्याटिक’ भनिन्छ ।

प्रधानमन्त्री पुष्पकमल दाहालले आयोगले प्रविधिको प्रयोग गरिरहेको र नयाँ प्रविधिको प्रयोगतर्फ अघि बढ्नु उपर्युक्त रहेको बताए । सबैतिर स्मार्ट फोन प्रयोग गर्न थालिसकेकाले ‘स्मार्टम्याटिक’ प्रयोगमा आउन सक्ने उनको भनाई थियो । उनले निर्वाचन हुनेमा आशंका नगर्न पनि सबैमा आग्रह गरेका छन् ।

बेलायतको हाउस अफ लर्डका पूर्वसदस्य लर्ड ब्राउनको टोलीले विद्युतीय मतदान मेशिनबारे जानकारी गराएका थिए । लर्ड मतदानका लागि विद्युतीय मेशिन उत्पादन गर्ने कम्पनीको सीईओसमेत रहेकाले नयाँ प्रविधि देखाउन नेपाल आएका हुन् । उनकाअनुसार यस्तो मेशिन ब्राजिल र फिलिपिन्समा बढी प्रयोग भएको छ ।

आयोगको हलमा प्रधानमन्त्री दाहाल, पूर्वप्रधानमन्त्री माधवकुमार नेपाल, माओवादी केन्द्रका नेता नारायणकाजी श्रेष्ठ, संघीय समाजवादी फोरमका नेता अशोक राई, सांसद् रुक्मणी चौधरीलगायत विभिन्न दलका १० जना सांसद्ले विद्युतीय मेशिनबाट नमूना मतदान गरेका थिए ।