काठमाडौं, जेठ १८ ।
बार्सिलोनाका पूर्वखेलाडी भइसकेका नवनियुक्त प्रशिक्षक अर्नेस्टो भालभेर्देले बार्सिलोनालाई अझै माथिल्लो स्तरमा पुर्‍याउँदै क्लबलाई ठूलो क्लबका रूपमा पुनः स्थापना गर्ने लक्ष्य रहेको बताएका छन् ।

एथ्लेटिक बिल्बाओबाट बार्सिलोना आएका प्रशिक्षक भालभेर्देले यसअघि सन् १९८८ देखि १९९० सम्म प्रशिक्षक योहन क्रायफको ऐतिहासिक बार्सिलोना टोलीबाट खेलेका थिए । उनले त्यस समय र अहिले धेरै फरक रहेको बताए । ‘त्यो धेरै पहिलाको समय थियो । म आफैं अहिले बुढो भइसके । त्यो समय र अहिलेको समयमा धेरै अन्तर आइसकेको छ । म त्यसबेला युवा अवस्थामा थिएँ र अनुभव थिएन । तर अब म परिपक्व भइसकेको छु र यो कदम कति महत्वपूर्ण छ भन्ने मैले महसुस गरेको छु ।’

उनले आफुले खेलेको क्लबले विश्वास गर्दै प्रशिक्षकको भूमिका निर्वाह गर्ने मौका दिएकोमा आफुलाई भाग्यमानी ठानेका छन् । ‘मैले यस क्लबबाट खेलाडीको रूपमा खेलें र अहिले प्रशिक्षकको जिम्मेवारी बहन गर्न पाउँदा एकदम खुसि लागेको छ । मैले अरू क्लबमा पनि यस्तो भूमिका राम्रोसँग निर्वाह गरेको छु र यसलाई पनि त्यसै अनुरूप लाने विश्वास लिएको छु ।’

उनले समर्थकहरूलाई आफुले बार्सिलोनाको पद्दतिबाट उत्कृष्ट प्रदर्शन गर्दै सफलता हात पार्नेमा ढुक्क रहन सुझाव दिए । ‘हामी समर्थकहरूलाई खुसि पार्न चाहन्छौं । खेलाडीहरू खेलप्रति दत्तचित्त भएर त लाग्ने नै छन्, समर्थकहरू प्रति पनि उत्तिकै व्यवहारमा उत्रिनेछन् भन्ने विश्वास मैले लिएको छु ।’

‘बार्सिलोनाले बितेका वर्षहरूमा थुप्रै उपाधि जितेको छ । यसक्रममा विभिन्न प्रशिक्षक र खेलाडीहरूले क्लबमा आफ्नो नाम लेखेका छन् । म त्यसलाई निरन्तरता दिँदै अझै उत्साह थप्ने जोश लिएर क्लबमा आएको छु ।’