काठमाडौं, माघ २७ ।
नियमित रूपमा बस्दै आएको आजको मन्त्रिपरिषद्को बैठक स्थगित भएको छ । आईजीपी नियुक्तिका सम्बन्धमा प्रधानमन्त्री पुष्पकमल दाहाल र कांग्रेस सभापति शेरबहादुर देउवाबीच विवाद चर्किएपछि बैठक स्थगित भएको श्रोतले जनाएको छ ।

यही साता अवकाश पाउन लागेका आईजीपी उपेन्द्रकान्त अर्यालको ठाउँमा वरियताका आधारमा डीआईजी नवराज सिलवाललाई आईजीपी बनाउनुपर्ने अडानमा प्रधानमन्त्री दाहाल उभिने भएपछि देउवा रुष्ट बनेका हुन् ।

प्रधानमन्त्री दाहालले प्रहरी संगठनभित्र पार्टीले हस्तक्षेप गर्न नहुने र संगठनमा अहिलेसम्म रहेको चेन अफ कमाण्डलाई बिगार्न नहुने बताएको भए पनि देउवाले तेश्रो वरियताका डीआईजी जयबहादुर चन्दलाई आईजीपी बनाउन दबाब दिएको श्रोतले बताएको छ ।

आज बिहानै बालुवाटार पुगेका मुख्यसचिव सोमलाल सुवेदीलाई प्रधानमन्त्रीले बैठक स्थगित भएकोबारे मन्त्रीहरूलाई सूचना दिन निर्देशन दिएका हुन् । देशभरीका २६ डीआईजीमध्ये नवराज सिलवाल पहिलो वरियतामा छन् भने दोश्रोमा प्रकाश अर्याल र तेश्रोमा जयबहादुर चन्द रहेका छन् ।