काठमाडौं, माघ २९ ।
संविधान संशोधन नभए पनि आगामी जेठ १ गते स्थानीय निर्वाचन सम्पन्न गर्ने प्रधानमन्त्री पुष्पकमल दाहालले प्रतिबद्धता जनाएका छन् ।

नेकपा माओवादी केन्द्रका उपाध्यक्ष नारायणकाजी श्रेष्ठ प्रकाशको प्रयासमा शुक्रबार उनकै निवास ललितपुरस्थित हरिसिद्धिमा प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीसँग भएको करिब डेढ घण्टा लामो गोप्य वार्ताका क्रममा प्रम दाहालले कुनै पनि हालतमा जेठ १ गते स्थानीय निर्वाचन गर्ने र आगामी फागुन ८ गते त्यसका लागि आवश्यक घोषणा गर्ने प्रतिबद्धता जनाएका हुन् ।

श्रेष्ठको निवासमा भएको ओली–दाहाल वार्तामा एमाले उपाध्यक्ष भीम रावल र माओवादी केन्द्रका नेता श्रेष्ठलगायत सहभागी थिए । माओवादी केन्द्रको सचिवालय श्रोतले दिएको जानकारीअनुसार दाहालले आफ्नो भनाई प्रारम्भ गर्दै जेठ १० गतेभित्र स्थानीय निर्वाचन सक्ने गरी संविधान संशोधनसहित निर्वाचनमा जाने प्रस्ताव राखेका थिए । उक्त प्रस्तावलाई ठाडै अस्वीकार गर्दै एमाले अध्यक्ष ओलीले किन र के–का लागि संविधान संशोधन प्रस्ताव भन्ने प्रश्न राखेका थिए । ओलीको भनाईलाई उद्धृत गर्दै श्रोतले भने, ‘प्रधानमन्त्रीजी, तपाईं सिधैँ निर्वाचन घोषणा गर्नुहोस्, हामो साथ र सहयोग रहन्छ । मधेशी मोर्चासँग पनि सम्बन्ध सुधार गर्दैछौं । नडराउनुहोस्, हामी तपाईंको काँध थाप्न पनि तयार छौं ।’

श्रोतकाअनुसार अनावश्यक संविधान संशोधनमा किन जाने भन्ने ओलीको प्रश्नमा दाहालले संविधानको व्यापक अपनत्वबाटै त्यसको सफल कार्यान्वयन हुने भएकाले आफू त्यो प्रयासमा लागिरहने बताएका थिए । दाहालले चुनाव मिति घोषणा गरेपछि पनि मधेशी मोर्चासँग छलफल र संविधान संशोधनमार्फत उनीहरूलाई संविधानको अपनत्व ग्रहण गराउँदै निर्वाचनमा सहभागी गराउने प्रयासमा लागिरहने अडान लिएका थिए ।

नेताहरूबीच जेठ १ गते पहिलो चरणको निर्वाचन गर्ने गरी फागुन ८ गते मिति घोषणा गर्ने, ८ गते नै स्थानीय तह पुनर्संरचना आयोगको प्रतिवेदन निर्वाचन आयोगलाई दिने सहमति भएको दाबी श्रोतले गरेको छ ।

नेता श्रेष्ठले स्थानीय निर्वाचनको मिति घोषणा गर्ने र संविधान संशोधन प्रक्रिया पनि अघि बढाउने सहमति भएको बताए । उनले भने, ‘दुबै पक्षको विवाद मिलाउने मेरो प्रयास हो । म आफ्नो प्रयासमा दृढ छु ।’
आजको अन्नपूर्ण पोष्ट दैनिकमा समाचार छापिएको छ ।