काठमाडौं, माघ २९ ।
नेकपा (माओवादी केन्द्र)का अध्यक्ष एवं प्रधानमन्त्री पुष्पकमल दाहाल अहिले स्थानीय निकायको चुनाव गराउन शीर्ष दलका विशिष्ट नेताहरूसँगको भेटघाटलाई तीब्रता दिँदै गएका छन् । योसँगै उनले यथाशीघ्र चुनावको तयारीमा जुट्न निर्वाचन आयोगलाई पनि बेला–बेलामा निर्देशन पनि दिँदै आएका छन् ।

जसरी चुनावको माहौल विस्तारै अगाडि बढ्दै गएको छ, त्यसैगरी आफ्नो ध्यान पनि औपचारिक कार्यक्रमहरूमा बढी केन्द्रित गर्दै लगिएको छ । तर, यो कार्य आफैँले बोलेको कुराको विपरीत भएको हेक्का राख्न सकेका छैनन् ।

करिब एक महिना अगाडि मात्र राजनीतिक गतिरोधको अन्त्य र अवरुद्ध संसद्को बैठक सुचारु गर्न छाडेर औपचारिक कार्यक्रम उद्घाटन गर्न गएको भन्दै आलोचना भएपछि प्रधानमन्त्री दाहालले सोही दिनदेखि औपचारिक कार्यक्रममा नजाने प्रतिबद्धतासमेत जनाएका थिए ।

तर, त्यसको विपरीत प्रम दाहालले गएको एक महिनाको अन्तरमा करिब २६ वटा औपचारिक कार्यक्रमको उद्घाटन गर्न देशका विभिन्न ठाउँमा पुगेका छन् ।

यसरी प्रधानमन्त्री दाहालले औपचारिक कार्यक्रममा बढी समय दिएकै कारण अघिल्लो साता मन्त्रिपरिषद्को नियमित बैठकसमेत बस्न सकेनन् भने संविधान संशोधन, चुनाव, भूकम्पछिको पुनःनिर्माणलगायतका कामलाईसमेत राम्रोसँग प्राथमिकता दिन सकिरहेका छैनन् । जसले गर्दा भूकम्पबाट पीडित जनता र स्वयम् व्यवस्थापिका संसद्मा रहेका प्राय सांसद्हरूसमेत प्रधानमन्त्री दाहालसँग रुष्ट बनेका छन् ।

अबको समयमा पनि यसरी औपचारिक कार्यक्रममा गएर रिबन काट्ने र पानसमा बत्ती मात्रै बालेर बस्ने हो भने भोलिको दिनमा चुनावको माहौल पनि विस्तारै घट्दै जानुको साथै जनता र समर्थकहरू पनि घट्दै जाने कुरामा कुनै शंका छैन ।