काठमाडौं, जेठ २४ ।
प्रथम प्रधानमन्त्री कप क्रिकेट प्रतियोगिताको अन्तिम (फाइनल)खेलमा दुई विभागीय टोली त्रिभुवन आर्मी क्लब र नेपाल पुलिस क्लब प्रतिस्पर्धा गर्ने भएका छन् ।

कीर्तिपुरस्थित त्रिवी मैदानमा भोलि बिहान ९ः०० बजेदेखि सुरु हुने अन्तिम खेलमा दुवै टोली विजय लक्ष्यका साथ प्रतिस्पर्धामा उत्रने छन् ।

त्रिभुवन आर्मी क्लबले सेमिफाइनल खेलमा मध्यमाञ्चल विकास क्षेत्रलाई चार विकेटले पराजित गर्दै फाइनलमा आफनो स्थान सुरक्षित गरेको थियो ।

त्यस्तै, नेपाल पुलिस क्लबले सशस्त्र प्रहरी बल (एपिएफ) लाई पराजित गर्दै फाइनलमा प्रवेश गरेको थियो ।  मुलुकको सर्वाधिक पुरस्कार राशि भएको जारी उक्त प्रतियोगितामा त्रिभुवन आर्मी क्लब अपराजित छ ।

समूह चरणको खेलमा तीन खेल खेलेको आर्मीले तीन खेलमा नै जित हासिल गरेको थियो । पहिलो खेल पूर्वाञ्चल विकास क्षेत्रलाई–९ विकेटले पराजित गर्दै आर्मीले विजयी भएको थियो ।

त्यसैगरी, आर्मीले सुदूरपश्चिमाञ्चल विकास क्षेत्रलाई आठ विकेट र नेपाल पुलिस क्लबलाई सात विकेटले पराजित गरेको थियो ।
यता समूह चरणको खेलमा समान तीन खेल नै खेलेको नेपाल पुलिस क्लबले दुई खेलमा जित तथा एक खेलमा हार बेहोरेको थियो ।

पुलिसले सुदूरपश्चिमाञ्चल विकास क्षेत्रलाई सात विकेट र पूर्वाञ्चल विकास क्षेत्रलाई नौ विकेटले पराजित गरेका थिए । त्यस्तै, क्लबले आर्मीसँग भने पराजित भएको थियो ।

राष्ट्रिय खेलकुद परिषद् (राखेप)ले आयोजना गरेको उक्त प्रतियोगिताको विजेता टोलीले रु. २० लाख प्राप्त गर्नेछ भने उपविजेताले रु.१० लाख प्राप्त गर्नेछन् ।