काठमाडौं, जेठ २५ ।
सर्वाधिक पुरस्कार राशीको प्रधानमन्त्री कप एक दिवसीय राष्ट्रिय पुरुष क्रिकेटको उपाधी दुई विभागीय टोली नेपाल आर्मी र नेपाल पुलिस क्लबले संयुक्त रूपमा जितेका छन् । राजधानीमा जारी फाइनलको खेल वर्षाका कारणले प्रभावित भएपछि दुबै टोलीले उपाधी बाँडेका हुन् ।

दुबै टोलीले पुरस्कार स्वरूप १५–१५ लाख रुपैयाँ प्राप्त गरेका छन् । कीर्तिपुरस्थित टीयू मैदानमा भएको उक्त खेलमा नेपाल पुलिस क्लबले दिएको एक सय २७ रनको लक्ष्यसहित आर्मीले जवाफी ब्याटिङ गरिरहँदा खेल वर्षाका कारण रोकिएको थियो । खेल वर्षाले रोकिनु अघि आर्मीले २ ओभर ३ बलमा १ विकेटको क्षतिमा ७ रन बनाएको थियो । आर्मीका महेश क्षेत्री ४ रन बनाएर आउट हुँदा अनिल मण्डल शून्य रनमा अविजित रहे । पुलिसका ललित भण्डारीले एक विकेट लिएका थिए ।

यसअघि, टस हारेर पहिले व्याटिङ गरेको पुलिसले ४५ ओभर १ बलमा अलआउट हुँदै एक सय २६ रन बनाएको थियो । पुलिसका लागि सुनिल धमलाले ३२, सिद्धान्त लोहनीले २० तथा दिपेन्द्र सिंह ऐरीले १९ रन बनाएका थिए । आर्मीका जितेन्द्र मुखियाले ४, सुसन भारीले ३ तथा सागर पुनले दुई विकेट लिए । प्रतियोगिताको बिजेताले पाउने २० लाख र उपबिजेताले पाउने १० लाख गरी ३० लाखको आधा आधा गरेर दुबै टोलीले १५–१५ लाख रुपैयाँ नगद पुरस्कार बाँडिएको थियो ।