भक्तपुर, फागुन २ ।
सत्तारुढ दल नेकपा (माओवादी) केन्द्रकी प्रवक्ता पम्फा भुसालले प्रमुख विपक्षी दलको रूपमा रहेको नेकपा (एमाले) पनि संविधान संशोधनको प्रक्रियामा सहभागी हुने कुराको खुलासा गरेकी छन् ।

रफत सञ्चार क्लबद्वारा आज आयोजित साक्षात्कारमा बोल्दै उनले एमाले मुलुकको जिम्मेवार पार्टी भएकाले संविधान निर्माणमा उसको भूमिका महत्वपूर्ण भएका कारण एमाले संशोधनमा सहभागी भई संविधान कार्यान्वयनमा अग्रसर भइरहेको बताइन् ।

एमालेले प्रधानमन्त्री पाउनको निम्ति मात्रै संविधान नलेखेको र पछिल्लो समय संविधान कार्यान्वयनको लागि संविधान संशोधनमा सहभागी हुनका लागि सकारात्मक भएको उनको भनाई थियो । एमालेले मधेशवादी दलसँगको छलफलमासमेत लचकता अपनाएको र विस्तारै एमाले संविधान संशोधनमा सहभागी हुने संकेत दिएकाले सरकारले तोकेको समयमा निर्वाचन हुने उनले बताएकी छन् ।

कसैले भ्रम फैलाउँदैमा जेठमा स्थानीय तहको निर्वाचन नरोकिने बताएकी उनले सरकारले निर्णय गरेर निर्वाचन आयोगलाई पत्र पठाइसकेकाले स्थानीय तहको निर्वाचन जेठभित्र भइसक्ने बताइन् । उनले कुनै क्षेत्र, जातिको मात्र राष्ट्रवाद नभएकाले राष्ट्रियतालाई मजबुत बनाउन संविधान संशोधनमा सबै समावेश हुनुपर्ने बताएकी छन् । स्थानीय तहको पुनःसंरचनाको विषय टुंगिने बित्तिकै सरकारले यथाशीघ्र स्थानीय तहको निर्वाचनको मिति घोषणा गर्ने र जेठमा निर्वाचन हुने उनको भनाई थियो । प्रवक्ता भुसालले स्थानीय तहको निर्वाचन कसैले चाहेर रोक्न नसक्ने र अन्य तहको निर्वाचन कात्तिकमा गर्ने गरी यहीँ सरकारले गृहकार्य गरिरहेको जानकारी दिइन् ।

वर्तमान सरकारले नै तीन वटै तहको निर्वाचन गर्ने र निर्वाचन नगरी सरकार परिवर्तन नहुने उनको दाबी छ । उनले तीन वटै तहको निर्वाचन नभएसम्म सरकारको गठबन्धन नटुंगिने बताइन् । एउटै पार्टीको सरकार बन्ने सम्भावना नभएको हुँदा वर्तमान सरकारले नै तीन वटै तहको निर्वाचन गरिसक्ने उनले बताइन् ।

उनले प्रहरी प्रमुख चयन गर्ने अधिकार राष्ट्रको कार्यकारी प्रमुखको भएको बताउँदै यो न्यायपालिका वा अरू कुनै निकायको अधिकार क्षेत्र नभएको बताए । उनले वर्तमान गठबन्धनले चयन गरेको आईजीपीको निर्णय नियमसंगत भएकोसमेत बताइन् ।