काठमाडौं, फागुन ३ ।
नेत्रविक्रम चन्द विप्लव नेतृत्वको नेकपा माओवादीसम्बद्ध विद्यार्थी संगठन अनेरास्ववियु (क्रान्तिकारी)ले काभ्रे जिल्लाका सात वटा क्याम्पसको स्ववियु निर्वाचन कार्यालयमा ताला लगाईदिएका छन् । अर्कोतिर विप्लवकै नेकपा माओवादीको अहिले थवाङ्गमा महाधिवेशन हुँदैछ ।

बनेपामा रहेको चैतन्य बहुमुखी क्याम्पस, काभ्रे बहुमुखी क्याम्पस, पनौतीमा रहेको तेजगङ्गा बहुमुखी क्याम्पस, इन्द्रेश्वर क्याम्पस, धुलिखेल क्याम्पस धुलिखेल, सर्वमङ्गला बहुमुखी क्याम्पस, पाँचखाल र डेडीथुम्का पब्लिक क्याम्पस डेडीथुम्कामा ती विद्यार्थी सङ्गठनले ताला लगाएका हुन् ।

उक्त विद्यार्थी सङ्गठनले अहिले घोषणा गरेको स्ववियु निर्वाचनको मिति उपर्युक्त नभएको भन्दै क्याम्पसको स्ववियु निर्वाचन कार्यालयमा ताला लगाईदिएको चैतन्य बहुमुखी क्याम्पसका क्याम्पस प्रमुख जुजुभाई मानन्धरले जानकारी दिए ।

अनेरास्ववियु (क्रान्तिकारी)का जिल्ला अध्यक्ष दिनेश सारुले आफ्नो सङ्गठनको कुनै पनि कुराको सुनुवाई नभएको र तीन विद्यार्थी सङ्गठनले सिण्डिकेट नै लगाएर निर्वाचनमा गएका कारण बाध्य भएर ताला लगाउनु परेको बताए । अध्यक्ष सारुले भने, ‘हामीले पटक–पटक भनेका थियौँ की हाम्रो पार्टीको अधिवेशन चलिरहेका बेलामा निर्वाचन नगरौँ भनेर तर त्यही समयमा निर्वाचन गर्न समय तोकिदिएका कारण हामीले बाध्य भएर स्ववियु निर्वाचन कार्यालयमा ताला लगाउनु परेको हो ।’ उनले तीन विद्यार्थी सङ्गठनले स्ववियु निर्वाचनमा सिण्डिकेट नै लगाएको आरोपसमेत लगाए ।

जिल्ला प्रहरी प्रमुख प्रहरी उपरीक्षक सहकूलबहादुर थापाले क्याम्पसका स्ववियु निर्वाचन कार्यालयमा ताला लगाएको भन्ने जानकारी आए पनि क्याम्पस प्रमुखहरूले जानकारी नै नदिएको बताउँदै आएका छन् ।