काठमाडौं, जेठ ३१ ।
एएफसी एसियन कपको छनौट चरण अन्तर्गत समुह ‘एफ’ को मंगलबार भएको दोस्रो खेलमा घरेलु टोली ताजिकिस्तानलाई ३ विरुद्ध ४ गोलले हराउँदै फिलिपिन्स शिर्षस्थानमा कायमै रहेको छ ।

फिलिपिन्सले फिल यङहस्बेन्डको २७ औं मिनेटको गोलमा अग्रता लिएको थियो । प्याटिनोले ४१ औं र ४८ औं मिनेटमा गोल गर्दै फिलिपिन्सलाई ३ विरुद्ध शून्य गोलले अघि बढाएका थिए । घरेलु टोलीका उमारबाहेभको ६१ औं मिनेटमा पेनाल्टीमार्फत गोल गर्दै खेलमा फर्कने संकेत दिए ।

भासिएभको ६१ औं मिनेटको गोलले गोलअन्तर घटेपनि साटोले फिलिपिन्सकालागि ७९ औं मिनेटमा गोल गर्दै जित पक्का गरे । घरेलु टोली ताजिकिस्तानकालागि जालिलभले खेलको अन्तिम समयमा सान्त्वना गोल गरेका थिए ।

समुहमा पहिलो खेल आफ्नो घरेलु मैदानमा नेपालसँग ४ विरुद्ध १ गोलले जितेको फिलिपिन्सको यो लगातार दोस्रो जित हो । त्यस्तै दुई खेलमा दोस्रो पराजय भोगेको ताजिकिस्तान समुहको पुछारमा छ । ४ अंक बोकेको यमन दोस्रो स्थानमा छ भने नेपाल १ अंकसहित तेस्रो स्थानमा रहेको छ ।