एजेन्सी, श्रावण १ ।
सेनेगलमा फुटबल फाइलन खेल भइरहेको बेलामा दुई पक्षबीच झडप हुँदा आठ जनाको मृत्यु भएको छ भने करिब ४९ जना घाइते भएका छन् ।

सेनेगलको राजधानी डकारमा रहेको डेम्बा दियोप रंगशालामा स्टेड डे एम्बोर र युनियन स्पोर्टिभ वाकमबीच लिग कप फुटबलको फाइनल खेल भइरहेको थियो । उक्त रंगशालामा झडप नियन्त्रणमा लिनको लागि प्रहरीले अश्रुग्याँस प्रहार गरेको थियो ।

अश्रुग्याँसबाट बच्न सयौं समर्थकहरू एकैपटक कमजोर पर्खाल चढ्न खोज्दा पर्खाल भत्किएपछि सो घटना भएको जनाएको छ ।

भागदौड मच्चिनुपूर्व अतिरिक्त समयमा सकिएको उक्त खेलमा स्टेड डे एम्बोरले २–१ गोलले जितेको थियो ।