काठमाडौं, श्रावण १५ ।
चर्चित टीम रियल मड्रिडलाई ३–२ गोलले हराउँदै बार्सिलोनाले इन्टरनेशनल च्याम्पियन्स कप हात पार्न सफल भएको छ ।

अमेरिकाको सनलाईफ स्टेडियम, मायामीमा आज सम्पन्न भएको खेलमा बार्सिलोनाको गोलमा लियोनल मेस्सीले तेश्रो मिनेटमा, इभान राकेटिचले सातौँ मिनेटमा र जेरार्ड पिकेले ५० औँ मिनेट गोल गर्दै उक्त उपाधी हात पार्न सफल भएको हो । पराजित रियल मड्रिडका लागि कोभाकिकले १४ औँ मिनेटमा र मार्को एसेन्सियोले ३६ औँ मिनेटमा एक–एक गोल मात्र गर्न सफल भएका थिए ।

आगामी सिजनको खेलको तयारी स्वरूप प्रि–सिजन टूरमा रहेको बार्सिलोनाले यसअघि युभेन्टस् तथा म्यान्चेष्टर युनाईटेडलाई हराएको थियो ।

आजको जितसँगै बार्सिलोनाका प्रशिक्षक अर्नेष्टो भालभर्डेको काम सन्तोषजनक रहेको प्रतिक्रियासमेत आएको छ । यसै सिजनमा आबद्ध भएका उनले खेलाएको तीन वटै खेलमा जित हात पार्न सफल भएको हो ।

यसैगरी, कपको सर्वाधिक गोलकर्ता बार्सिलोनाका नेयमार बनेका छन् । उनले उक्त खेलमा तीन गोल गरेका थिए ।