काठमाडाैं, चैत २४ ।
काठमाडाैं केन्द्रित आन्दोलन गरिरहेकाे नेपाल शिक्षक महासंघले अनिश्चितकालीन शैक्षिक हड्तालको घोषणा गरेको छ ।

महासंघले आज आइतबार एक प्रेस विज्ञप्ति जारी गर्दै भाेलि सोमबारदेखि देशव्यापी शैक्षिक हड्तालको घोषणा गरेको हो ।

महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाले जारी गरेको विज्ञप्तिमा परिक्षाको नतिजा प्रकाशनलगायतका सबै काम ठप्प पारेर शैक्षिक हड्तालाई सफल बनाउन देशभरका शिक्षक, कर्मचारीहरूलाई आग्रह गरिएको छ ।

सरकारसँग विभिन्न मागहरू राख्दै आएको महासंघले माघ २० गतेबाट आन्दोलन सुरु गरेका हुन् । महासंघले चैत २० गतेदेखि काठमाडाैं केन्द्रित सडक आन्दोलनमा रहेकाे छ ।

गुणस्तरीय विद्यालय शिक्षा, विद्यार्थी र शिक्षक/कर्मचारी मैत्री विद्यालय शिक्षा ऐन जारी गराउन सरकारलाई दवाब दिने उद्देश्यले शैक्षिक हड्ताल घोषणा गरिएको महासंघले जनाएको छ ।

देशभरका सबै विद्यालय बन्द गरी काठमाडौंको शैक्षिक आन्दोनलमा सहभागी हुन अनिवार्य रूपमा सहभागिता जनाउन आग्रह गरिएको छ ।

विज्ञप्तिमा भनिएको छ, ‘यो अवधिमा उत्तर पुस्तिका परीक्षण, नतिजा प्रकाशन, तालिम गोष्ठी, सेमिनार, शैक्षिक भ्रमण जस्ता कुनै पनि काममा संलग्न नहुन र यो आन्दोलनप्रति ऐक्यबद्धता प्रकट गर्न विद्यार्थी, अभिभावक, विद्यालय व्यववस्थापन समितिलगायत सबै शैक्षिक सरोकार पक्षहरूसँग आग्रह गर्दछौँ ।’