काठमाडौं, श्रावण १५ ।
‘अल्ट्रा’ धाविका मीरा राईलाई शनिबार सम्मान गरिएको छ । धावन क्षेत्रमार्फत भोजपुरलाई विश्वभरी चिनाउन सफल भएकाले राईलाई ‘भोजपुरे सेवा समाज’ले आयोजना गरेको कार्यक्रममा अर्थमन्त्री ज्ञानेन्द्रबहादुर कार्कीले सम्मान गरेको हो ।

उनी धावन क्षेत्रमा ‘एड्भेञ्चरर अफ दि इयर’ जित्न सफल भएकी थिइन् । कार्यक्रममा अर्थमन्त्री कार्की, पूर्वअर्थमन्त्री शङ्कर कोइराला, जापानी राजदूत मासासी ओगावा र सोलुखुम्बुका समाजसेवी डोमा शेर्पालाई पनि सम्मान गरिएको थियो ।

उक्त कार्यक्रममा अर्थमन्त्री कार्कीले संघीय लोकतान्त्रिक गणतन्त्रात्मक संविधान निर्माण भएपछि २००७ सालदेखिको नेपाली जनताको सपना पूरा भएको उल्लेख गर्दै अब मुलुकमा राजनीतिक आन्दोलन समाप्त भई आर्थिक क्रान्ति हुनुपर्ने समय आएको बताएका थिए ।

नेपालका लागि जापानी राजदूत मासासी ओगावा, सांसद् जयन्ती राई, तारादेवी राई तथा मोहनकुमार राईको पनि कार्यक्रममा सहभागिता थियो ।