एजेन्सी, श्रावण २४ ।
विश्व एथलेटिक्समा ‘गोल्डेन गर्ल’ को उपनामले चर्चित आफ्नो समयकी चर्चित अष्ट्रेलियन खेलाडी बेट्टी कथबर्टको ७९ वर्षको उमेरमा सोमबार निधन भएको छ ।

ओलम्पिक खेलकुदको इतिहासमा उनी महिला एक सय, दुई सय र चार सय मिटर दौडमा स्वर्ण पदक जित्ने एक मात्र खेलाडी थिइन् । उनले सन् १९५६ मा आफ्नै राष्ट्रमा आयोजित ओलम्पिक खेलकुदको एक सय, दुई सय र चार गुणा एक सय मिटर रिले दौडमा स्वर्ण पदक जितेपछि ‘गोल्डेन गर्ल’ को उपनाम पाएकी थिइन् । त्यतिबेला उनले भर्खर १८ वर्षमा पाइला टेक्दै गरेकी थिइन् ।

विश्व एथलेटिक्समा कथबर्टले हासिल गरेको उपलब्धिको कदर गर्दै मेलबर्न क्रिकेट रंगशालाको प्रवेशद्वारमा उनको प्रतिमूर्ति राखिएको छ । सन् १९६० को ओलम्पिक खेलकुदका क्रममा घाइते भएपछि उनी करिब १८ महिना प्रतियोगिताबाट टाढिएकी थिइन् । लामो समयको विश्रामपछि पुनः ट्रयाकमा फर्किएकी कथबर्टले सन् १९६४ मा जापानको टोकियोमा सम्पन्न ओलम्पिक खेलकुदको चार सय मिटर दौडमा स्वर्ण पदक जितेकी थिइन् ।

कथबर्टले आफ्नो सक्रिय खेल जीवनमा विभिन्न स्पर्धामा नौ वटा विश्व कीर्तिमान बनाएकी थिइन् । उनी अन्तर्राष्ट्रिय ट्याक एण्ड फिल्ड महासंघबाट ‘हल अफ फेम’ ले सम्मानित हुने अष्ट्रेलियाकी पहिलो खेलाडी पनि हुन् । अन्तर्राष्ट्रिय एथलेटिक्स महासंघ (आईएएएफ) र अष्ट्रेलियन एथलेटिक्स महासंघले कथबर्टको निधनप्रति गहिरो दुःख व्यक्त गर्दै विश्व एथलेटिक्सको एउटा जिउँदो इतिहास ढलेको उल्लेख गरेका छन् ।

कथबर्ट सन् १९६९ देखि अस्वस्थ्य रहँदै आएकी थिइन् । पछिल्लो पटक उनी सन् २००० मा अष्ट्रेलियाको सिड्नीमा भएको ओलम्पिक खेलकुदको उद्घाटन समारोहमा उपस्थित भएकी थिइन् । त्यतिबेला उनले ओलम्पिक ज्योति पनि बोकेकी थिइन् ।

त्यतिबेला ओलम्पिक ज्योति प्रज्ज्वलन गर्ने क्याथी फ्रिम्यानले कर्थबर्टको निधनबाट आफू स्तब्ध भएको बताउँदै उनी आफ्नो प्रेरणाको श्रोत भएको प्रतिक्रिया दिएकी छन् । सन् २००० को ओलम्पिकमा फ्रिम्यानले चार सय मिटर दौडमा स्वर्ण पदक जितेकी थिइन् ।