रोनाल्डो लामो समयसम्म प्रतिबन्धमा पर्ने सम्भावना

काठमाडौं, श्रावण ३० ।
स्पेनिस सुपर कप अन्तर्गत पहिलो लेगको खेलमा रेड कार्ड पाएका क्रिस्टियानो रोनाल्डोले रेफ्रीमाथि देखाएको आक्रोशको कारण लामो समय प्रतिबन्धमा पर्ने सम्भावना बढेको छ ।
बार्सिलोनाविरुद्ध आइतबार भएको खेलमा रोनाल्डोले २ मिनेटको अन्तरमा २ पहेंलो कार्ड खाँदै मैदान बाहिरिएका थिए ।
सुपर कपको पहिलो लेगमा बार्सिलोनाविरुद्ध ८० औं मिनेटमा उत्कृष्ट गोल गरेपछि आफ्नो जर्शी खोलेर खुशी मानाउँदा रोनाल्डोले पहिलो पहेंलो कार्डको सामना गरे । त्यसको १ मिनेटपछि बार्सिलोनाको बक्समा लडेर पेनाल्टीको अपेक्षा गर्दा रिकार्डो डी बुर्गोस बेनगोएस्ताले उनलाई दोहोरो पहेंलो कार्ड देखाए ।
प्रतिकारमा आक्रोशीत रोनाल्डोले रेफ्रीलाई धकेलेपछि उनीमाथी थप कारबाही हुने सम्भावना बढेको छ ।
स्पेनिस फुटबल एसोसिएसनको नियम अनुसार रेफ्रीमाथी हात लगाउदा ४ खेलदेखी १२ खेलसम्म गुमाउने निश्चित हुन्छ । रेफ्री डी बुर्गोसले आफ्नो खेलपछिको प्रतिवेदनमा रोनाल्डोले धकेलेको पनि खुलाएका छन् ।
त्यसैले रोनाल्डोले खेल गुमाउने सम्भावना बढेको हो ।
प्रतिक्रिया