काठमाडौं, श्रावण ३२ ।
काठमाडौंमा भदौ २ गतेबाट सुरु हुने १५ वर्षमुनिको साफ च्याम्पियनसिप फुटबलको सम्पूर्ण तयारी पूरा भएको अखिल नेपाल फुटबल संघ एन्फाले जनाएको छ ।

प्रतियोगितामा सहभागी हुने विभिन्न पाँच विदेशी टोली बुधबार काठमाडौं आउँदैछन् । अफगानिस्तान र पाकिस्तानको आन्तरिक कारणले प्रतियोगितामा सहभागी नहुने भएकाले ६ टोलीको मात्रै सहभागीता रहने आयोजकले जनाएको छ ।

एन्फाका अनुसार अफगानिस्तान काफमा बढुवा भइसकेकाले प्रतियोगितामा सहभागी नहुने भएको छ भने पाकिस्तानले आन्तरिक समस्याका कारण प्रतियोगिता नखेल्ने भएको छ ।

बंगलादेश, भुटान र श्रीलंका समुह ‘ए’ मा छन् भने आयोजक नेपालसँगै भारत र मालदिभ्स समूह ‘बी’ मा छन् । नेपालले भदौ ५ गते मालदिभ्ससँग पहिलो खेल खेल्नेछ । समूहका शीर्ष दुई टोली सेमिफाइनलमा प्रवेश गर्नेछन् ।

सेमिफाइनलका खेलहरू सातदोबाटो र सशस्त्र प्रहरीको खेल मैदान हल्चोकमा एकसाथ खेलाइने एन्फाले जनाएको छ । प्रतियोगिता भदौ २ देखि ११ गतेसम्म ललितपुरको सातदोबाटोस्थित एन्फा कम्प्लेक्समा हुनेछ ।