एजेन्सी, पुस १७ ।
बुरुण्डीका एक मन्त्रीको राजधानी बुजुम्बुरामा आज बिहानै गोली हानी हत्या गरिएको छ । पानी, वातावरण र योजना मन्त्री इम्मानुएल नियोन्कुरुको आज हत्या भएको प्रहरी प्रवक्ता पाइर्रे कुरिकियले सामाजिक सञ्जाल ट्वीटरमार्फत जानकारी दिएका हुन् ।

वातावरण मन्त्री स्थानीय समयानुसार मध्यराति पाैने १ बजे आफ्नो घरबाट रोहेरो भन्ने स्थानमा जाँदै गर्दा अपराधिहरूकाे एक समूहले गरेको आक्रमणमा परी नियोन्कुरुको मृत्यु भएको कुरिकियले ट्वीटरमा जानकारी दिएका थिए । घटनास्थलबाट प्रहरीले एक जना महिलालाई पनि पक्राउ गरेको उनले जानकारी दिए ।

राष्ट्रपति पेइर्रे कुरुन्जीजाले पनि मृतकका आफन्त र बुरुण्डीका जनताप्रति सहानूभूति व्यक्त गर्दै हत्यारालाई कारबाही गरिछाड्ने प्रतिबद्धता व्यक्त गरे । बुरुण्डीमा सन् २०१५ बाट सुरु भएको हिंसाका कारण अहिलेसम्म पाँच सय जनाको मृत्यु भएको छ भने तीन लाख जना विस्थापित भएका छन् ।