काठमाडौं, पुस १८ ।
जम्मु काश्मिर हुँदै भूमध्य सागरबाट आएको पश्चिमी वायुको प्रभावका कारण देशभर चिसो बढेको छ । अाज पनि पश्चिम र पूर्वी पहाडी जिल्लामा हल्का वर्षासँगै हिमपातको सम्भावना रहेकाे छ ।

शनिबार र आइतबारको हिमपातका कारण पहाड र हिमाली क्षेत्रको जनजीवन प्रभावित भएको छ । उत्तरी धादिङको विभिन्न क्षेत्रमा असिना पानी परेको छ भने केही भागमा हिउँ परेको छ । दार्खा, झार्लाङ, सत्यदेबी, रि सेमजोङ गाविसमा असिना पानी परेका कारण जनजीवन प्रभावित भएको छ ।

जल तथा मौसम पूर्वानुमान महाशाखाकाअनुसार पछिल्लो २४ घण्टामा जोमसोममा नाै मिलिमिटर पानी परेको छ । जिरी र काठमाडौंमा हल्का पानी परेको छ । मौसमविद् बरुण पौडेलले भाेलि मंगलबारदेखि मध्य र पश्चिमी क्षेत्रमा मौसम खुल्ने अनुमान गरिएको जानकारी दिए । पूर्वमा भने पश्चिमी वायुको प्रभाव केही दिन रहने उनले बताए ।

यस्तै काठमाडौंमा आइतबार यस वर्षकै चिसो भएको छ । आइतबार काठमाडौंको तापक्रम ३ डिग्री सेल्सियसमा झरेको छ । यो यस वर्षकै सबैभन्दा कम तापक्रम भएको मौसमविद् बरुण पौडेलले बताए । उनकाअनुसार पुस सकिनै बाँकी रहेको र माघ महिना पनि आउनै बाँकी रहेकाले चिसो अझै बढ्नेछ ।